Ko te karakia i te Turei Aperira 14 i te 11 o nga haora. E rima tekau nga tangata i te karakia; 15 i tango i te Hapa Tapu. Ko te ohaoha £1 1s 6d i tukua mo te perehitanga i nga Mahi o te Hui. I te toru o nga haora ka mine te Hui ki te Horo a Hone Hetete, a ka mutu te karangaranga nga ingoa o nga mema, ka timataia te mahi e te Upoko ki te inoi. Muri iho ka tu te Paraimete ki te whaikorero—koia tena:—

page 27

I nga tau tuatahi o toku nohoanga ki Nui Tireni, kihai nga Pakeha i tukua mai ki tenei waahi o to Pihopatanga; a kihai i whai wahi te Hahi Maori. Tupu ake ana he whakatupuranga kahore i mohio ki te Rongopai o Ihu Karaiti. Inaianei kua rere ke te ahua, a kua ngakautahi te Pakeha me te Maori kia nohotahi i runga i te rangimarie, i runga i te aroha. I tae tae mai ano nga minita Maori o raro e era tau tau ki te tirotiro i o konei tangata, otira kihai i ata paingia e te katoa. Ko te rua tenei o nga tau o taku tononga mai i nga minita tokorua kia noho tuturu ki te Pourewa kia mahi ai ki nga kaainga o taua takiwa. Kua manakohia aua hoa o taton, kua whai tikanga ta raua mahi. Ko ta raua wahi e noho nei kei tahaki o te nuinga o te tangata, na reira i mea ai ahau me kore ranei e taea te whakaneke tetahi o raua ki waenganui o te iwi tokomaha. Tera pea e kitea e Ngatimaniapoto tetahi whenua hei nohoanga me te whare me tetahi wahi oranga mo taua minita! Tena te mea e tupu ai te Whakapono, ko te ako i nga tamariki i nga kaumatua hoki ki te Katikihama o te Hahi, ko te whakarapopotonga hoki tenu o nga tikanga o te Rongopai. Kia puta ano te uaua ki te tuku i nga tamariki ki te kura kia riro ai te reo Ingarihi. Ko te kuwaha hoki tena ki te matauranga o te Pakeha. E ahua pouri ana ahau mo te ruarua o nga mangai reimana i tae mai ki te Hui, otira he take ano pea i noho atu ai. Tokotoru o nga minita o te Atirikonatanga o te Waimate e noho nei. Te take o to ratou haere mai he mea kia mohio ai tenei pito o Hahi kei te mahara mai tera pito ki koutou.