Title: Proceedings of of the Kohimarama Conference, Comprising Nos. 13 to 18 of the “Maori Messenger.”

Publication details: Auckland

Part of: He reo ture nō te taha Kāwana / Language of the Crown

License: Creative Commons Attribution-Share Alike 3.0 New Zealand Licence

Na Te Waka Perohuka tenei kupu.

Kotahi tonu to Turanga mahi, he mahi witi, hemahi kaipuke, he mahi whare karakia ki te Atua. Ko ta matou tenei e mate nuia ai o roto o nga tikanga Pakeha, ko te tiki mai ko te hoko i nga kaipuke o Akarana nei, ko te hoko hoki i nga taonga, kia kotahi ai he waka mo tatou, kei tukua ki te waka Maori koi he. Ka noho i konei o Turanga tangata katoa, ko te pai anake. Ko nga ingoa tenei o nga kainga ko tahi ano ture:—Ko te Wairoa, ko te Whakaki, ko Nuhaka, ko Nukutaurua, ko Te Mahia, ko Te Mahanga, ko Whareongaonga, ko Maraetaha, ko Wherowaero, ko Turanga, ko Pouawa, ko Wangara, ko Puatai, ko Nawa, ko Tangioro, ko Kaiaua, ko Tokomaru, ko Waipiro, ko Whareponga, ko Tuparoa, ko Te Horo, ko Rangitukia, ko Waiapu, ko Horoera, ko Te Kawakawa, ko Punaruku, ko Wharekahika, ko Rete, ko Tokakuku. Ka mutu nga tangata.

Kotahi ano ture o enei kainga, ko te whakapono anake ki te Atua, hei whakaaro hoki mo nga tikanga a te Kuini, a te Kawana Koa Paraone.

Ko tenei, e aku tuakana, whakaputaina mai nga mea e matenuitia ana e matou, te pu, te paura, nga mea e hiahiatia ana e matou e te hunga o runga o te ture, kia rite ai a tatou korero. Me he mea e whakaaetia ana tenei kupu e koe, e pai ana.

Tenei ano taku. I te raumati ka tae mai ahau ki te korero Mira mo to matou nei kainga mo Turanga, mo Pakohai. Ka rite a maua korero ko Te Mete, ma te Kawanatanga e mahi, e tohutohu nga tikanga mo taua Mira wai, ta te mea kua noho aku moni ki a te Kawanatanga, mana e mahi. E mea ana ahau kia wawe ahau te kite. A te mutunga o ta tatou runanga ka whakarite ai i taua korero kia rongo hoki matou, te hunga o runga, i taua korero. Heoi, kia whakamaramatia hoki tetahi Pakeha hei hanga.