E aku hoa aroha, tena koutou i mahue atu na koutou i au i runga i a tatou whakaaro, kua tae ora mai ahau ki taku kainga. Ko te whakataunga a te Tumuaki mo nga Pooti. Koia tenei, i a Karaitiana 415, i a Te Keepa 377, i a Hikairo 376, i a Te Hotene 146. Ko enei Pooti kua hinga i te Kawanatanga, mo te korenga o te Tumuaki mo te whare Pooti ki te Kawakawa. Akuanei ano tatou Pooti ai, kia rongo mai koutou, kia tupato koutou, me korua hoki, ki a korua tangata mo taua ra. Otira, kia mohio au ki te ra mo taua Pooti, ka haere atu ano ahau, kua oti te tangata mo Te Wairoa, mo Nukutauru, mo Turanga, mo Whangara, kotahi mo Uawa, ko ahau mo koutou, kotahi mo te Arawa, kotahi mo Wairarapa, ko enei tangata hei titiro mo nga Pooti e hinga ai tatou. Kia kaha rawa te tiaki i nga tangata mo to tatou Pooti, ka mutu, na to korua hoa iti.