P. Patapu—E tautoko ana ahau i te tono a nga tangata o Wairarapa ki reira tu ai to tatou Paremata o te tau 1896.

M. Waharoa—Ko taku Motini he aroha noku ki nga iwi, tuarua he aroha kia Te Arawa E mea ana ahau heoi ara ngawari mo nga iwi te haere mai a e mohio ana ano koutou ki etahi atu o nga pai, ara i nga Ngawha nei tae atu ki nga wai, no reira o tono ana ahau ki nga iwi katoa o te motu.

T. Waata—Me whakatuturu te Paremata ki Rotorua ma te Arawa e whakarite nga tono a nga iwi katoa notemea ko Rotorua kei waenganui pu o te motu me te tika mo nga iwi o te Kotahitanga ki te haere mai.

H. Tukino—No te tau 1892 ka motinitia e au me tu te Paremata ki Taupo. I te tau 1893, ka kokiritia ano e au te Motini a araia ana o te Motini a Wi Pare me tu ki Pakirikiri i te tau 1894, notemea he whakaaro ki nga tangata a te tai rawhiti, a te hui ki pakirikiri ka kokinitia ano e au taku Motini page 47a nekehia mai ana ki konei a tenei ra 1895, ka kokiri atu ano ahau ko taua Motini ano ko taku whakaaro nui rawa e kaha nei ahau mo Maniapoto raua ko Waikato, otira e aroha ana ano ahau ki te tono a te Arawa, e takoto nei me taku miharo kia koe e te Arawa ia taua e noho nei i te hui nei, no reira e te Arawa me aroha mai hoki koutou ki ahau me whakanuku ake te Paremata ki Taupo a te tau 1896. E pouri ana ahau ki te tono a Wairarapa notemea ko Tamahau anake te mea kaore ano i haina ki te kirihipi titiro mai tatou ki Ngati Maniapoto me Waikato, kaore nei ano i haina ki te kirihipi ko oku whakaaro e nga Honore Mema kei runga kei enei ko nga iwi o waho kia aru ki tenei mahi, a tera e haina ratou ki te kirihipi.

H. Heke—E whakamihi ana ahau ki te kaha o na wahine o Rotorua ki te mahi oranga mo tatou no reira ahau e mea ana kaore ano hoki au i te pai kia rua ngenge mo ratou mo nga tau e rua no reira ahau i ki penei ai kia koutou e nga mema kaua e utaina ano he taumahatanga ki runga o Rotorua a te tau 1896. Notemea ko nga moni e pau mo nga kai ki konei a te tau 1896, e nui rawa atu i nga moni e pau mo te haere ki Wairarapa, no reira e te Honore Mema o te Arawa nana nei te Motini, kaati kua puta to aroha a heoi ano. E tautoko ana ahau i te tono a Wairarapa a notemea ko Wairarapa te waenganui a Aotearoa me te Waipounamu, no reira ahau i tono ai ki nga mema o te Runanga me awhina mai taku Motini.

M. Waharoa—E pai ana ano nga korero engari ko taku hiahia me paahi ki Rotorua te nohoanga tuturu mo te Paremata.

H. Tupara—Ki Rotorua te nohoanga tuturu mo te Runanga o te [unclear: Kotahitanga].

H. Paerata (Minita)—Ko nga tangata o Opene Pei i te takiwa o Ngatiporou. E hiahia ana ki tenei Paremata kia tu ki reira a tenei ake ano te wa Motinitia e ahau tenei Runanga kia noho ki reira a etahi tau, heoi e tautoko ana ahau i nga korero me to Motini a Hone Heke me tu ki Wairarapa a te tau 1896.

H. Hautehoro—E tautoko ana ahau me tu ki Wairarapa.

H. Tomoana—E mea ana ahau hei muri o te hui o te Kauhanganui ka whakatuturu ai engari e whakaae ana ahau hei tuturu mo te tau e haere mai nei me tu te Paremata ki Rotorua e pai ana ano te teno o Wairarapa, otira na ratou te taonga a e mea ana ahau me unu te Motini a Hone Heke.

T. Hapimana—E tautoko ana me tu ki Wairarapa te Runanga 1896.

Tiamana—No te upoko o te ika ki Arawa, no Kahungunu, katoa a ka 3 nga tau i tu ai ki reira. A i te takiwa o te Arawa ka kotahi tonu a no reira e mea ana ahau me waiho ki te takiwa o te Arawa te Runanga 1896.

T. Tautoko ana ahau me tu ki Taupo.

A. Motunau—E tautoko ki Taupo.

Pika—Kua marama uga take mo enei Motini no reira e mea ana ahau me tuku ki te pooti.

H. Heke—E pai ana me unu ora mai taku Motini kia ora mo tetahi wa.

H. Tomoana—E tautoko ana ahau i te Motini a nga wahine me noho tuturu te Paremata ki Rotorua timata atu i te tau 1896.

H. Tukino—E mea ana ahau me whakatau ki Taupo te tunga mo te Paremata 1896.

Kua paahitia ko Tokaanu, Taupo, te tunga mo te Paremata a te tau 1896.