The Ancient History of the Maori, His Mythology and Traditions. Nga-Puhi [Vol. X, Māori]
Upoko VI
Upoko VI
Nga Tupuna A Nene Raua Ko Wi-Hau
(Nga-Puhi)
Ka noho a Rangi te tupuna a Te Waka Nene i Te mairi, te pa i te wahapu o te awa i Wairere, i runga ake o Te Rua Korora.
A ko Korohue ko te tupuna a Wi Hau i noho i Ohau iti, ka haere atu a Korohue i Ohau-iti, ka ahu ki Te Maire, a kohurutia ana a Korohue e Rangi.
Ka puritia taua kohuru nei e te iwi o Korohue, a i te wa i haere ai a Rangi ki Utakura, ka tae aia ki te wehenga o te ara e ahu ai ki Uta-kura, ki Waihou ka rokohanga aia e nga uri o Korohue, patua ana aia ka mate. He taua te mea i huakina ai a Rangi i taua wa, a na te taua aia i patu mo Korohue.
Te Kai-Puke Tuatahi Ki Mango-Nui
(Te Patu, Nga-Puhi)
I nga ra o mua noa atu, i u te tahi kai-puke ki Mango-nui, he korero aua korero i kiia mai e a matou koroheke i kite i aua tupua, ki a matou, ka u te kai-puke ra ki Mango-nui, a ka puta te awha, ka noho te hunga turoro o au mai-tai ki uta, a na te iwi o Te-patu aua turoro ra i whangai, he aroha atu hoki ki aua pakeha, a mao noa te ra ka hoe te rangatira o Te-patu kia kite i te iwi mai-tai ra i tona kai-puke, a herea ana taua rangatira o Te-patu a Rangi nui e te upoko o aua mai tai, a here atu ana taua kai-puke me te Rangi-nui, a ngaro atu ana ki te rere noa atu i te moana, kahore kau he take a aua mai-tai i herehere kau ai i a te Rangi-nui a i maua noatia ai aia ki waho ki te moana, na aua mahi nei te Maori i mahi raweke ai i te mai-tai u noa mai ki enei motu, kia taea ai te utu, mo aua mate mo a te Maori i te mai-tai.