Na Te Taua A Nga-Ti-Mania-Poto
I Huaki Te Taua Patu I Maunga-Whau
(Nga-Ti-Whatua)

Na Nga-ti-mania-poto i huaki te taua ki te patu i Maunga-whau, a ko Nga-iwi e noho ana i nga Pa i Maunga-rei, Maunga-whau, Maunga-kiekie, Raro-tonga, me etahi atu o nga Pa o aua ra.

Te uri o Hua, ko Ika-mau-poho, tana ko Kiwi, a i noho a Kiwi i Maunga-whau me Te-wai-o-hua i noho ano hoki ki reira, a ko te tama a Kiwi ko Rangi-ka-maturu i noho ki Maunga-kiekie, a i noho a Kiwi ki O-wai-raka, a ko Maunga-kiekie i mahue te noho o taua Pa i nga ra o Rangi-ka-maturu, te take i mahue ai te noho o taua Pa, he mea kia nohoia ai etahi wahi o te takiwa ki Tamaki, otira i noho tonu a Te-wai-o-hua i Maunga-whau page (52)a no aua wa ra i ngaro ai te ingoa ra a Nga-iwi ki roto ki te ingoa nei o Te-wai-o-hua, a i noho tonu Te-wai-o-hua i Maunga-whau, i Maunga-kiekie, a i O-wai-raka, a i nga ra o Rangi-maturu he wahine i huakina aua Pa nei e Wai-kato, a kihai aua Pa ra i taea e te taua, a hoki rawa ana te taua ki Wai-kato.

Ta Hua ko Hua-tau, tana ko Te-ata-i-rehia a i noho tenei wahine i Maunga-kiekie.

Ta Pou-ate ko Horeta, ko Kiri-ngarahu he wahine.

Ko Tama-ure te rangatira tino whakamutunga o Maunga-whau, ka mahue taua Pa te noho e te tangata.

No te ngahuru matou i haere atu ai i Wai-te-mata, ka anga te haere ki Wai-kato, ka hoe i te waka i roto i Wai-kato a ka ahu te haere ki Roto-rua, ka haere tonu matou a Tara-wera, Ahu-riri, Wai-ru, Moko-kai, Te-mahia, Te Matau-a-Maui, Te Whanga-nui-a-tara, Tara-naki, a hoki noa mai ki Wai-kato, a i a matou e ngaro atu ana i runga, kua taea a Mokoia, me Mauinaina e Hongi-hika, ka tae mai matou ki Wai-te-mata, ka hoe matou ki Mahurangi, a ka tu ta matou Pa i reira, a huakina ana matou e te hapu a Te-tira-rau e Te-para-whau i reira, a hinga ana matou, a ka whati mai matou ki Motu-tapu, a na Rori o Nga-puhi matou i huaki ki reira, a ka hoe ano matou ka hoki ki Mahurangi ki te takitaki i ta matou mate, a ka toia a matou waka ki te wahi tapu tupapaku, a ka huakina te kainga o Te-para-whau e matou, ka patua nga tane ka page (53)whakarau nga wahine e wha te kau e matou a no muri iho o tenei te parekura o Te-ika-ranga-nui ara o Wai-makomako i hinga ai.

Ko Tu-hawaiki i patua ki Mahurangi i mate ai, a ko Tomo-a-ure i patua i mate ai ki O-rohe, i te tahi taha o te awa o Tamaki ko te Hehewa i mate, a nehua ana i te wahi tapu i Piha i te wahi tapu i Puke-more (Puke-morea).

Nga Korero Mo Tara-Kumikumi,
Me Nga Mahi O Mua A Tae Noa Mai Ki Tatou Nei
(Nga-Ti-Whatua)

I nga ra o mua, ara he roa noa atu, e tae pea ki te tini noa atu o nga whakapaparanga o Tara-kumikumi ka tae mai ki nga ra i a tatou nei, ka whanau a Tara-kumikumi, i te iwi nei i a Te-waio-o-hua, me tana teina hoki, kia puta i taua teina nei ko Kape-taua, a ka moe a Tara-kumikumi i te wahine a Kape-taua, a ka hoe a Tara-kumikumi raua ko Kape-taua ki te hi ika i waho ake o Kohi-mara, i te toka kowhatu i te moana, a ka tae raua ki reira ka waiho te tamaiti ra a Kape-taua e Tara-kumikumi i aua toka ra noho ai, a he tai pakea ka noho te tamaiti ra i te tai pakea, a ka huri te tai, a ka nuku ake te tai i aua toka ra, me te nuku ake te tai, a ka tae ki nga turi o Kape-taua, a ka tae ki te kopu, ka karanga a Kape-taua ki te tangata hei tiki atu i aia kia ora ai aia i te tai, a ka rongo tana tuahine te wahine a Tara-kumikumi ki tana karanga, a ka hoe atu aia i Kohi-marama i runga i te kopapa, a tae atu aia ki tana tungane kua tae te tai ki tana kaki, ora iti kua paremo aia i te tai, a ka ora mai a Kape-taua i tana tuahine, ka waiho taua mahi a Tara-kumikumi hei mauahara ma Kape-taua ki tana taokete a nui noa aia, ara kia kaumatua rawa a Kape-taua. A ka pakeke a Kape-taua, ka oho tana taua taitamariki o Nga-ti-paoa ka huakina eia a Tarakumikumi i te Pa i Orakei, a ka taea taua Pa, a ka whakaekea ano hoki e ratou ko te Pa i Kohi-marama, a ka taea tera, a he nui te parekura, otira ka ora atu a Tara-kumikumi, a ka whiti aia ki Wai-heke, a ka whaia aia e Kape-taua raua ko tana taua page (55)ki reira, a ka mau aia me tana wahine, me ana tamariki i a Kape-taua, a patua katoatia ana eia, me te patu tonu a Kape-taua i o reira tangata, me te whakaekea nga Pa a taua motu, a moti noa te iwi o te whenua, a nohoia ana e ratou taua moutere, a ka noho aia a Kape-taua ki Putiki i Wai-heke, a noho tonu atu a Kape-taua i Wai-heke, kihai i hoki mai ki Orakei i nga ra o Kiwi i noho ariki ai mo te iwi nei mo Te-wai-o-hua, i te mea hoki ko etahi o Te-wai-o-hua i patua ra e Kape-taua i Orakei a i Kohi-marama, i te taua tuatahi ana ki te patu i a Tara-kumikumi he mea pea i kore ai a Kape-taua e hoki mai ki reira, he nui no te iwi o Kiwi e noho ana i nga Pa i Maunga-kiekie, i Maunga-whau, i O-wai-raka, me Remu-wera me nga Pa nunui katoa o taua takiwa, a tu ai te pahu, me te pu-tara a Kiwi me te tini o nga ariki o taua iwi ra i Maunga-whau, hei karanga i taua iwi i nga wa e puta ai te taua ki aua Pa.

A ka mate nei a Kape-taua i te mate turoro, a ka mate ano hoki a Kiwi i a Nga-ti-whatua i Paru-roa, ka tu te Pa i Te-umu-ponga i Orakei, i Orakei, a i taea taua Pa e oku tupuna i te wa i patua ai taua iwi ra e oku i hoe atu i Kahu-topuni.

Tenei hoki kia korerohia nga mahi o mua i nga ra o Kiwi e noho ana i Maunga-kiekie, i Maunga-rei, i Mangere, i Ihu-matao, i Remu-wera, i Omahu i Remu-wera, i Te-umu-ponga, i Kohi-marama, i Taurarua, i Te-to, i Raro-tonga, i Te-tatua, a i O-wai-raka, he noho haere ta Kiwi i aua tini Pa nei, i te mea hoki kei nga o me nga mau o te tau, ka noho a Kiwi i ia Pa i ia Pa i nga wa page (56) o aua kai ngakia ana a e hauhakea ana, a i nga wa ano hoki e hia ai te ika, a e haoa ai ano hoki, a e kohia ai nga hua manu i nga moutere o te moana, a e papaki kaka ai, a e patu ai a e rere ai i te kuaka. I nga wa o te ngaki kai ka noho a Kiwi i Maunga-whau, kia tata ai aia ki nga papa e ngakia ai te kumara, a i nga wa e hii ai i te mango, ka noho aia i Mangere, a he mea ano ka hiia te mango i Ngutu-wera ka noho aia i Te-to, a i nga wa e papaki kaka ai te iwi i Ngutu-wera, ka noho aia a Kiwi i Tepahi, a ka patu te iwi i te kuaka ka noho aia i O-wai-raka, a he mea ano i Te-tatua, a ka kohi te iwi i te hua manu i nga motu o te moana ka noho a Kiwi i Taka-runga, i te mea hoki ko Kiwi te tino upoko o te iwi, a noho haere ai aia i ia Pa i ia Pa i te mea ko te iwi mai tonu hei tiaki i aia, i aia atu ano i te awa o Tamaki a te awa o Te-whau atu ana, a i Manuka, a Wai-te-mata atu ana, a na Kiwi i huaki te kainga i Wai-tuoro i te wa i turia ai te hakari e Te-tao-u ki aia i reira, a ka mate i aia o Te-tao-u i tana kohuru e toru te kau takitahi, otira na raua ko Te-rangi-kake-tu taua kohuru, a no taua wa ano i kohurutia ai ano eia i Mimiha-nui i Kai-para, a Tahataha te tuahine o Tupe-riri, o Te-tao-u ano hoki, a na Kiwi hoki i kohuru a Kahu-rau-tao i O-tahuhu, tetahi o te iwi o Nga-ti-maru, a na Kiwi ano hoki i kohuru a Te-huru raua ko Te-kaura o te iwi o matou o Nga-ti-whatua i Kai-para. Ka tahi a Nga-ti-whatua ka oho, ka riri mo a ratou mate i a Kiwi a ka tu te taua a Te-waha-akiaki, a ka haere taua taua ra, ka ma te akau o te tuauru, a ka tae page (57)ki te wahapu o Manuka, ka mahi i te moki, a ka whiti ki tawahi i te po ki Tara-taua, a ka huakina tena e ratou, ka patua a Te-wai-o-hua, ara a Nga-iwi i reira, a ka haere tonu te taua ka patua te Pa ra i Awhitu no Te-wai-o-hua ano hoki a ka patua ratou i taua Pa, a ka tahuri ano te taua ra ka huakina ko te Pa i Puke-horo-katoa i te taha ki te hau raro o Awhitu, a kihai taua Pa nei i taea, a hoki mai ana a Nga-ti-whatua ki te taha o Manuka, ki Te-rau-o-te-huia, a ka hoki mai ano ki Kai-para nei noho ai, a roa kau iho ano ka auraki ano toku iwi ki te patu tangata i a Kiwi ma, hei utu mona i kohurutia ra e Kiwi, a ka hapainga ano te taua a Te-tao-u ara o Nga-ti-whatua o Kai-para, ka ahu te haere ki te takiwa ki Titi-rangi ki te hopu tangata mana o te iwi nei o Te-wai-o-hua i taua takiwa, nei koa, kua tae te rongo o te mate o era o ratou i patua nei e Nga-ti-whatua i Tihitai a i Awhitu, a aua patua nga pahu a Kiwi i taua Pa i Maunga-whau, a kua hoho te reo o te pu-tara ki te karanga i te iwi kia huihui ki te taua, a kua hui nga toa o nga Pa nei o Maunga-kiekie, o Mangere, o Ihu-matao, o Moe-rangi, o Otahuhu, o Raro-tonga, o Mau-inaina, o Manu-rewa, o Matukurua, o nga Pa katoa e nohoia ana e Te-wai-o-hua, mai reira ka haere atu ratou i O-wai-raka ka whai te haere ki Titi-rangi, tae atu ratou ki Paru-roa, kua tae noa mai a Te-tao-u ki reira noho ai, tatari ai i te tangata o Te-wai-o-hua kia patua aia. Ano ka kite a Kiwi me tana ope i te iwi o Kai-para, ka whaia e Kiwi ma, e kake ana te ope a Te-tao-u i te pikitanga ki Te-whau, ka mea nga hoa o page (58)Tupe-riri kia nohoia kia patua te taua e whai mai ra i a ratou, ka mea atu a Tupe-riri "Taria e hoki, haere tonu tatou, a kia kite ai ano tatou i te wai o Wai-te-mata ka tu ai tatou, ka whakahoki ai i te whana patu i a Kiwi, me manu ka hoki tatou i a tatou." Haere tonu te taua a Nga-ti-whatua, ano ka eke i te hiwi ka tu, rere te oma ake a Kiwi ma, a ka tata, ka whiua te patu i Tupe-riri ki tera ka hinga, me te karanga ana a Tupe-riri "Turia, patua," a ka tu ka kekeri te iwi ra, a ka hinga a Kiwi i a Tupe-riri a ka whati Te-wai-o-hua ka anga ki tahaki o Manuka, a ka whaia e Te-tao-u ka patua haeretia, a tae noa ki tatahi ki te waka o Kiwi ma ka tomo i te tangata ka kokiri ki waho ka hoe, ka whaia te waka ra e te tangata horo te oma a Te-tao-u a ka werohia ki tana paraoa te waka ra a too katoa mai te waka ra ki uta, kua tae iho te taua a Te-tao-u ki tatahi, patu kau e ratou te hunga i te waka ra ka mate era, ka hoe te taua a Te-tao-u i nga waka a ka ahu ki roto ki One-hunga, a ka tauria te Pa o Te-wai-o-hua e ratou i Maunga-kieikie, te Pa o Kiwi a ka taea, a ka whati whaka Wai-kato te iwi e noho ra i etahi o aua tini Pa, a ka nohoia te whenua e Te-tao-u, a ka kainga nga tini ika o te parekura e Te-tao-u, ko Kiwi i whakanoi ki te kauere i Kopiro-nui e ratou, he mea hoki mo te kupu a Waha-akiaki i kai ai ki a Kiwi. Ka whati te whati ra, ka hokia mai ano etahi ki Mangere noho ai, a ka kite a Te-tao-u i tera ka tauria taua Pa, nei koa kua mahara te iwi i te Pa ra, e kore e rangona te taua haere atu ki te whakaeke i a ratou i te po, a mahia page (59)ana nga ara ki taua Pa ki te ngaingai pipi, mo te haere rawa ake o te taua i te po ka ngaehe aua pipi i te takahanga o te tangata, a ka rangona e te Pa. A ka whakaekea te Pa e Tupe-riri, a ka tae te taua ra i te po ki aua ara i nga pipi, ka uhia aua pipi ki nga kahu topuni o te taua, a kihai i rangona te ngaehe o nga pipi, whakaeke kau te Pa ra, a ka taea a ka whati nga mea i whati ki te ara kowhatu i tatahi, a ka kite a Te-tao-u, mahia ana te waha o te ana ki te puaka, ki te paketai, a tahuna ana, a ka mate era i te ana, too kau ki waho tahu ai, kai ai, nga mea i whakaorangia o Te-tao-u i ora hei hunga ki te kainga.

Roa kau ano Te-tao-u ki Mangere noho ai ka hiahia manako ki te kainga i Kai-para, a hoki ana ratou ma te ara ki Te-whau ki Kai-para, roa roa e noho ana i reira ka tahi hoki hoki mai etahi o Te-wai-o-hua ki a ratou Pa ano noho ai, a ka rongo a Kai-para ka turia mai ano te taua takitaki i te mate o Te-hura raua ko Te-kaura. Ki ano mai i ea noa to ratou mate, a ka haere mai te iwi o Kai-para ka ma Kahu-topuni mai a ka eke i te waka kotahi, ka hoe mai ki Te-pahi he moutere kei te awa o Wai-te-mata i tawahi ake o te ngutu awa o Te-tauhinu, a ka utaina he nikau e ratou i reira ki te waka, a ka hoe mai ka taki ki Ngutu-wera, ka noho te iwi a te waka ra e whitu te kau takitahi ki te riu o te waka ra a ka uhia ki aua nikau a ka hoe te tokorua, kotahi i te ihu kotahi i te kei, a ka aia e te taitimu ka ahu ki waho ki Orakei, ka noho aua tini ra i te riu o te waka, a nga toa o Nga-ti-whatua i te waka nei ko Takai, ko Te-pahi, ko Te-raorao-whaia, ka hoe tonu te tokorua ra i te waka ra, a u noa ki raro page (60)iho o Kohi-marama, ka puta te tangata o te Pa ra, ka haere iho ki tatahi kia kite i te tokorua ra i hoe mai i roto i te awa o Wai-te-mata, ka tae noa iho ano te ini o te iwi o te Pa ra ki tatahi, ka tahi te iwi e kopapa ra i te riu o te waka ra ka oho, patu kau te iwi e matakitaki ra, a ka whati ratou, ka whaia a ka tomo ki te Pa, tomo nga tahi raua ko te taua ki te Pa, a ka horo taua Pa, ka patua nga tangata, a ka tauria ko te Pa i Taura-rua, me te Pa i Rangi-toto, ko enei i horo i te iwi nei i a Nga-ti-whatua, ko aua Pa nei no Te-wai-o-hua ona ariki ko Hu-pipi raua ko Humataitai he mahanga raua a ka mau raua ka hawea ki Te-pahi i patu ai kai ai a ka patua te iwi i aua Pa nei, a ka hoki ano a Ngati-whatua ki Kai-para, a ka noho te hapu a Te-tao-u i Wai-temata, a ka tae a Tupe-riri ka nohoia aia te Pa i Maunga-kiekie, a ka riro i aia te whenua katoa nei, e kiia nei ko Tamaki.

He Kiwi ano te Kiwi tupuna, a he Kiwi ano te Kiwi i patua nei o te iwi o Kai-para. A ko te tupuna wahine o Pae-rimu tetahi o te hunga i kohurutia e Kiwi tamaiti i Mimiha-nui. Nga wahine a Te-hehewa ko Huia-tara no Nga-ti-kahu, no Te-wai-o-hua, me Teke no Te-wai-o-hua ano hoki a i mate a Te-hehewa ki Te-rau o-te-huia, a nehua ana aia ki te wahi tapu o Horohoro i te takiwa ki Wharenga i te wahapu o Manuka, a no muri iho i hahua ai e ana huanga, maua ana nga koiwi ki te wahi tapu i Piha ki te takiwa ki Wai-takere, na Te Kawe-rau nga koiwi i mau ki reira, ki te wahi tapu ki Puke-more, i runga ake o te awa o Karekare.

Ka noho nei a Te-tao-u i te whenua nei i Wai-te-mata, a ka hokihoki mai etahi o Te-wai-o-hua, a ka iwi kotahi ki Te-tao-u page (61)a ka kiia aua tangata ra ko Nga-oho, a ko etahi a Te-wai-o-hua i kiia ko Te-uri-ngutu, a ko te Pa i Maunga-kiekie i nohoia e aua hapu nei hei Pa matua mo ratou, a ko a ratou Pa e hokihoki a ki te mahi kai ma ratou ko O-rewa i Ngutu-wera, i a Tara-hawaiki taua Pa nei raua ko Te-waha-akiaki, ko Te-tao-u i noho ki Te-to a i a Wai-taheke taua Pa, ara koia te tino tangata o taua Pa, a ko te Pa i Mango-nui i roto atu i Ngutu-wera i a Rere-tua-rau taua Pa, me ona uri o Te-tao-u, a i aia ano hoki te Pa i roto atu i te Tauhinu, ara koia te tino tangata o aua Pa e rua ra, a ko aua Pa nei na ratou i takea ai te mana o te moana o Wai-temata ki a matou ki Te-tao-u, a na Horeta raua ko Awarua i noho nga Pa i Mangere, a i Ihu-matao hei tiaki i te mana o te moana o Manuka, a noho hoki hoki ana nga tangata noho i aua Pa nei o Mangere a o Ihu-matao ki o Wai-kato iwi, a moe ana te tahi i o tetahi wahine, koia i takea ai a Te Kawau Apihai ki Wai-kato a ka huanga ratou ki a ratou.

Ko Te-horeta no Nga-oho aia, kia puta i aia ko Te-tahuri he wahine, a ka moe te wahine teina a Te-tahuri, ara a Te-kehu ka puta i te tahi tangata o te iwi o Nga-ti-paoa ia Te-putu a ka mea taua tangata a Te-putu, kia noho aia i Tamaki, koia a Te-tahuri i toro ai ki a Te-kehu, ki te tahi wahi whenua kia rohea mona i roto i te awa o Tamaki, a ka whakaae a Te-kehu ki te tono o tana whanaunga a Te-tahuri, a rohea ana he whenua mana i Mokoia, a puta noa ki Whakamuhu, a ki te roto i Wai-ata-rua, a ka noho a Te-putu me tana wahine, me a raua whanaunga page (62) i reira, nei koa he whenua pai tenei wahi, a ka nui te tupakihi o taua whenua, a ka rongo a Wai-kato ki taua korero o te whenua i tukua nei e Te-tahuri ma, Te-putu ma, ka whakaaro a Wai kato he mate, he whawhai te tikanga iho o te uri tangata ke, ara noho i te whenua o te iwi tupu ake no ratou te whenua, a ka mea nga kaumatua o Wai-kato "E kore e wheau ka haurangi nga wahine nei (a Te-tahuri raua ko Te-kehu) i te tutu" a he mea tino roherohe taua whenua e Te-tahuri mo Te-kehu, a e hara i te whenua tupu ake na Nga-ti-paoa a ona tupuna ake, no te mea he whenua tuku ki te tahi uri ano o Te-wai-o-hua, a i moe hoki taua uri a Te-kehu i to Nga-ti-paoa tangata, a i noho taua tane i te whenua a tona wahine. Roa kau iho ano o Te-putu raua ko tana wahine e noho ana i tera whenua, ka hoe tetahi tangata a Nga-oho ki Mahurangi ki te hii mango, a i reira ano hoki te tahi tanga o Nga-ti-paoa a hii ana ano hoki i te mango, ka patua Nga-oho e Nga-ti-paoa, a ka hinga a Tara-hawaiki i reira, te teina a Tupe-riri, a nana a Te-kawau Apihai, a roa kau iho ano ka turia te parekura e aua iwi ra ara, a Nga-oho raua ko Nga-ti-paoa i Rangi-mata-riki i Te-whau, a ko Nga-ti-paoa i mate i taua parekura, a he nui ona i mate i reira, a i taona a Nga-ti-paoa ki reira, a i kainga e Nga-oho a ra ano nga hangi o taua kai tangata te tuwhera mai ra ano i enei ra, a mo te mate o Nga-oho i Mahurangi taua parekura, otira he mea tiki e Nga-ti-paoa, ki reira riri ai ki a Nga-oho, a ko te taua whakaeke i mate.

Roa kau iho ano, kia mahara Te-tao-u ki ano i rite taua mate i Mahurangi, ka tukua ta page (63)ratou ngakau ki etahi o te iwi o Wai-kato i Manuka e noho ana, kia haere mai hei haumi patu mo Nga-ti-paoa e Te-tao-u, a ka hoe aua hapu ra, ka whiti ki Wai-heke ki te patu i a Nga-ti-paoa, a kore kau noa ake a Nga-ti-paoa i kitea ai ki reira, a ka hoki mai aua hapu ra ka hoki ki to ratou kainga, a ka u mai ratou ki te taha ki Tamaki, ka huakina ratou e Nga-ti-paoa, a ka tu aua patu, ka parekura i O-rohe i te taha ki te hauauru o te awa o Tamaki, a ka mate ko Te-tao-u raua ko Wai-kato, a ka mate a Te-tahuri nana ra i tuku te whenua ki a Te-kahu, a ka mate ano hoki te tane a Te-tahuri a Tomo-a-ure, a ka mate ano hoki te tama a Kiwi i taua parekura, ara a Rangi-ma-toru, e noho tahi ana i roto i te iwi na ratou ra tana papa i patu, ara a Nga-oho raua ko Te-tao-u, a koia nei te riri mutunga o nga parekura o nga patu kino o nga ra o mua, a kihai noa ake i rite te utu o nga mate a te tahi, a o te tahi i taua parekura nei, a takoto utu kore ana nga tupapaku me nga mate a Te-tao-u, a o Nga-oho, me Nga-ti-paoa, kihai mea ake aua mate i ia a kihai noa ake aua tupapaku i rite, a takitaki noa ana aua hapu nei i a ratou mate kia ea kihai noa ake i ea, a e takoto ea kore nei ano.

I te wa i turia ai taua riri nei, ara taua parekura i oroho nei i runga ake, ara i uta ake o Piha i Wai-takere a Te-tao-u, me Nga-oho e noho huna ana, kei patua e te hoa riri, a ko Tupe-riri me tana ope e noho ana i Maunga-kiekie, a ko Tau-oma kua mahue te noho o te tangata i reira, a kua tupuria a reira e te ururua, a noho ana nga iwi o Kai-para i te takiwa ki Titi-rangi, a tute haere ana ona toa i te hoa riri, kei page (64)nohoia te takiwa ki Te-whau i Wai-te-mata, a kei noho i Pu-ponga i roto i Manuka, a nei ano nga wahi o te takiwa ki Piha te tupuria nei e te Manuka o nga ngakinga a nga hapu o Kai-para i te takiwa ki Titi-rangi.