Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

He pukapuka ako tenei i nga ritenga pai e-maha o roto o te taonga nei o te moni, i nga tikanga pai hoki, o te hokohoko, o te aha, o te aha

Upoko I. — Ko nga tikanga o te Taonga nei o — Te Moni

page 13

Upoko I.
Ko nga tikanga o te Taonga nei o
Te Moni.

Koia ano, ka tahi ano te taonga pai he Moni! He inati te taonga nei te moni! Mehemea kaua te Moni, ka noho raru noa iho tatou, kaore hoki e riro mai nga Rawa e hiahiatia atu ai e te Ngakau o te tangata—Inahoki, mei kaua te Moni hei takawaenga, e hara i kiia ai, ho raru te raru o te tokomaha o te Pakeha, Waihoki, akuanei tatou kite ai, ina whakaritea taua kupu nei ki te tetehi mea noa ake nei—me whakarite pea ki te Kai Hanga Hu—koiano, tona taonga to te Kai Hanga Hu, he Hu ano—kati ano tona taonga tupu ake, he Hu—ko ona Moni he Hu—koia hoki—mei kaua te Moni, tena ia me ana tamariki e mate noa iho i te Kai Kore—nei ra, na te Moni —ka riro he kai—ka ora hoki ana tamariki; Tenakoa ianei, me whakarite marie te kupu nei;

Akuanei pea ko te kai Hanga Hu, ka tae ki ona Hu, ka kawe, ka haere ki te Kai Hanga Taro, ka tono ki te Taro page 14kia homai muna, kia hoatu ko nga Hu hei utu mo te Taro— akuanei—te kianga mai o te Kai Hanga Taro, he Hu ano ona—kahore ona pai ki te Hu, engari, tana i pai ai, he Potae—heoti, ka whakaro te Kai Hanga Hu, me pewhea ra —me haero pea, me kimi, i nga Kai hanga Potae, kia tangohia mai ko te Potae hei utu mo aku Hu—ko te Potae ina riro mai, me kawe akuanei ki te Kai Hanga Taro, kia riro mai ai he Taro, kia ora ai aku tamariki, aue,—te raru mo te tangata! mate ana i te kopikopikonga noatanga ki te kimi kai ma nga tamariki, wahi iti hoki ekore e riro mai.

Na te Moni ianei ka kore he raru—ekore hoki te taonga e takoto i te tangata whai—Moni—haere kau te taonga i tenei Hanga i te Moni—ahakoa Mea, haere ana ia ka riro— Inahoki, ekore te kanohi o te Kai Hanga Taro e hoki te titiro ki te Moni, he tuku noa mai i nga Taro, na te mea, kei te mohio tona ngakau, tena e riro te hoko ki te Moni te tini o nga taonga—e riro te Hu, e riro te Potae, e riro te aha, te tini noa iho o te Taonga, no roto—no enei whakapaparanga i mohiotia ai nga mahi raweke a te Moni—tena i mua, i he noa iho te Manawa o te Tangata i te kawenga haeretanga i ona taonga tupu ake, ki tera atu, hohoko ai; ko te tangata i pai ki te Hu—i pai, ko te tangata i kore, raru noa iho i te korenga o te Moni—nei ra, na te Moni ka ora te ngakau o te tangata:

Kua kiia mai e te Karaipiture—kia kaua tatou e aroha ki te Moni; Koiano, he he ano to te tangata, ina tukua whakareretia atu ona whakaro me tona ngakau ki runga o te Moni, kaore haunga ki te Moni anake, ki te tini noaiho o te taonga, o tenei Ao, inahoki, ko ta tenei tangata e pai ai, he Kai mo tana waha kia nui, kia reka; ko ta tera i pai ai, he Kahu mona kia tini, kia mahana ai, kia atahua ai te titiro e te tokomaha o te tangata—Engaro, page 15ma konei, ma aua taonga nei ka riro ke ai nga whakaro, ka mahue ko te Atua, ka riro katoa ki te Ao—no konei te kupu a to tatou Ariki a Ihu Karaiti i puta mai ai, kia whakanuia he taonga mo tatou i te Rangi, i te wahi ekore e taea atu e te Huhu e te Waikura—a ko te tetehi wahi e ako mai ana, kia wahiiti, te wahi o te ngakau e riro atu ki te Kai, ki te Inu, ki te Kahu ranei hei hipoki mo te tinana, engari, hei te Rangatiratanga o te Atua te kimihanga i te tuatahi; muri iho, ko nga mea o te Ao.

Ko tahi ano te mea, mana ka kore ai te ngakau o te tangata e ora— koia ia—ko te ngakau awekeweke tonu ki te tini o te taonga; kite kau ano i te taonga—kua puta rawa te hiahia—kahore hoki he tanga o te ngakau—he aro tonu, kia riro katoa i a ia—i tona kotahi—engari, ko te ngakau iti wahiiti nei hoki, ka tatu tona ngakau—tena hoki ia e whiwhi ki te taonga mona amua ake—ko tera, ko te tangata aweke tonu tona ngakau, ahakoa whai taonga ia—ekore e kiia he taonga, ta te mea, he ngakau apo—ko tona he— he he nui, inahoki—kei te whakaemiemi tonu ia i nga taonga o tenei Ao, kaore hoki i te tahuri atu tetehi wahi ki te Atua; Tika rawa te kupu a Ihowa, i mea ai, kia tupato ki ta tangata ngakau apo:

Engari ko te tikanga pai motatou, koia ia—he whakawhetai atu ki te Atua mo nga taonga e tukua atawhaitia mai ana kia tatou—ko tana tera, he homai—ko ta tatou, ko ta te kai tango atu, he whaimahara tonu kia pai te whakaritenga i aua taonga—ko te whakaritenga pai ra tenei—ko te hunga e whiwhi ana ki te taonga—kia hoatu ratou ki nga hoa rawakore i roto i te whakaponotanga.

No konei ka kitea te painga o te Moni—makonei, ka ora ai te tangata Rawakore—ko te tini o te taonga, kahore pea i whakarawea ki aia, tena—ko te Moni, te rironga atu ano, page 16tahuri tonu ia ki te hoko i nga mea i hiahia ai tona ngakau, he Taro ranei, he Wahie ranei, he Kakahu ranei, tera e riro katoa anei mea te hoko mai e te Moni—no konei, ka kitea rawatia te painga o te Moni.

I mua i te matenga o Huria i te Kai kore—i te oranga o Paora te Apotoro—ka puta te whakaro o nga tangata Kariki kia aroha atu ki nga Hoa rawakore, ki nga Akonga o te Karaiti i reira—heoti, whakaro ana ratou, ka tahi ano te hanga kino he uta atu i te Kai ki tawhiti— Kowai i hua ai, tenei te Witi te nui nei i konei i to tatou kainga—koiano— me pewhea—engari, me kohikohi ki te Moni ki te taonga pai —ki te taonga iti te takotoranga—koiano—huihuia ana a ratou Moni—na Paora ano i kawe—i riro ai he kai ma Nga Akonga te hoko mai ia wahi—ia wahi—i ora ai ratou i te mate kai— na te Moni, koia tenei tikanga—te tikanga aroha, te tikanga pai i puta ai.