I mine te Hui o te Hahi Maori o te Atirikonatanga o te Waimate ki te wharekarakia i Waimamaku i te Paraire,. Hanuere 31 me te Harerei, Pepuere 1, 1896. I te hawhe paahi o te tekau karaka a.m. te karakia whakapuare i te Hui. Te hunga i te karakia e 70: i tango i te Hapa Tapu, 22, ko nga mema anake. Te ohaoha £1 7s.1d. i tukua mo te perehitanga i nga mahi o te Hui. I te toru o nga haora p.m. ka noho te Hui a ka oti te karangaranga e te tumuaki nga ingoa o nga mema, ka kiia e ia he Hui e rite ana ki ta te ture i whakatakoto ai. Ano ka mutu te inoi ka whaikorero te Atirikona. I timataia tana korero ki te pukapuka a te Paraimete e mau nei:—

Akarana, Te ra o Paora, 1896.

E aku hoa, e nga mema o te Hui o te Hahi.

E pouri ana au moku te tae ki te Hui o tenei tau; otira ekore te Hui e hapa i au ka ngaro, inahoki ko to tatou hoa ko Atirikona Karaka hei whakakapi moku. Na te mate, me te maha o nga mahi kua tapiritia mai i au ka meinga hei Paraimete mo tenei Porowini, te tae ai au ki Waimamaku.

Mehemea i tae au ki ta koutou Hui, erua tahi nga mea e whakaaria e au ki o koutou aroaro (1) ka whakahau i nga minita kia ngahau, kia hono tonu te haerere ki te tirotiro i nga tangata o a ratou Pariha. (2) Ka whakahau i nga minita, i nga tangata katoa hoki, kia puta te uaua ki te ako i nga tamariki ki nga tikanga o te Whakapona Karaitiana.

Tera pea e whai korero te Hui mo nga mahi a to tatou hoa a Hohepa Matiu i roto i nga iwi i raro na. Mehemea ka takoto he tikanga kia kohikohi te iwi mo tetahi paraihe whakamaharatanga ki a ia ki te Wharekarakia i Kaitaia, ka uru au ki taua kohikohi, ka hoatu kia kotahi pauna. E inoi ana au kia noho te Atua kia koutou ia koutou e mahi na; me taku tono ano kia inoi koutou moku.

Na to koutou tuakana, Pihopa aroha.

(Signed) W. G. Auckland.