Nga Mangai Reimana.

page break

Ko te karakiatanga o tenei Hui, he Karakia whakaū. Kotahi tekau ma waru nga tangata i whakauria, a muri iho e ono tekau ma whitu nga tangata i tango i te Hapa a te Ariki—Nga hoa o te Pihopa i te tukunga o te Hapa Tapu, ko te Atirikona, ko Revs. Matiu Taupaki, Piripi Patiki, Renata W. Tangata, me Rupene Paerata. Ko te Ohaohatanga (£3 2s. 7d.) i tapiritia ki nga moni mo te Wharekarakia hou ki Waiparera.

I noho te Hui ki te Whare Karakia tawhito; a, ka oti te karangaranga e te Pihopa nga tangata o te Hui, ka kiia e ia he Hui e rite ana ki ta te Ture i whakatakoto ai. Ka mutu te inoi, ka tu a te Pihopa ka korero; ko enei nga korero.

E hoa ma, e nga Minita me nga Mangai Reimana, Tena Koutou. E hari ana ahau moku ka tae mai hei Upoko mo tenei nohoanga o te Hui o te Atirikonatanga o te Waimate. He hua no oka raruraru me aku mahi te tae tonu mai au ki nga Hui katoa. E ora ana taku ngakau i au ka kite nei i te tokomaha-tanga o koutou ki konei, e mahara ana hoki ahau he roa te whenua i takahia mai nei e etahi o koutou. He nui te pai o te mahi o nga iwi ki te whakaaro ki o ratou mangai reimana, ina hoki kua kohikohi moni a te Waimate, a Paihia, a Oruru, a Kaitaia, a Parengarenga, a Hokianga hei whakaea i a koutou mea e pau ana, ina haerere ki nga Hui. Ka rawe tenei hei tauira ma nga Pakeha. He tohu tenei e kake haere ana te whakaaro o nga tangata o tenei Atirikonatanga ki nga mea o te Whakapono.

Tenei ano nga take i kite ai ahau e neke ake ana nga mahi a te Hahi. Ko nga taitamariki e haere mai ana kia whakaukia i te mea e rite ana nga tau. Kotahi tekau ma whitu nga tangata i whakaukia i te ra o te Whakaaturanga ki te Kopuru. I haere mai tenei hunga i Parirau, 16 maero te tawhiti. Kotahi wiki i noho ai ratou ki a Rev. F. T. Peka, a nana ratou i whakaako. Ko Rev. P. Patiki e haerere ana ki Parirau, e 70 maero te mamao o reira ki Waiparera. Heoi ko tena hunga i whakaukia na he hua no tana mahi.

page 4

No Hanuere 11 i whakapuaretia ai e ahau he whare Karakia hou ki Taita (Kaihu). Ko Mere te ingoa o taua whare. Wahi iti kua tae nga moni a nga Maori ki te £300 mo taua whare Karakia. He hua tenei no te mahi o Rev. F. Koura ratou ko Revs. P. Patiki, ko F. T. Peka. Ka ora o tatou ngakau ina kite i a te Peka e whakahaere ana i te mahi a tona matua, a te Peka kaumatua.

Kua oti te whare minita ki Parengarenga, a meake a Rev. R. Paerata haere ki reira. E kake ana te kura o Pukepoto (Kaitaia) a kua karangatia e ahau nga tamariki tokowha o reira kia haere ki te kura o Tepene i Akarana kia tata ai ki au.

Kua oti tetahi wharekarakia pai ki te Touwai (Whangaroa) a e haere nei ahau ki te whakaū i etahi o nga tangata o reira. Ko enei nga mahi o te tau kua pahure nei, a, he mea tika kia whakapai atu tatou ki te Atua, kia whai ngakau hoki ki Tana mahi.

Tera pea e pera ano te pai o te tau kua timata nei. Ko a te Ratapu e haere ake nei ka whakarikonatia a Hare Peka ki te Waimate. He mahi honore, he mahi uaua tena ka tukua na ki a ia. He pai anake nga korero mona a ona kaiwhakaako i Akarana. Erua nga whare karakia hou meake nei whakaarahia ki Hokianga. Kua kohikohi nga Maori mo te kawe i te Rongopai ki nga tauiwi; he tohu tenei, kei te mahara ano koutou ki nga wairua o te hunga kahore ano i whitingia e te maramatanga o te Ora. Na tenei hoki i matauria ai ehara ta tatou whakapono i te whakarite kau. Ki taku ake whakaaro e kake ngatahi ana te noho tika a te iwi me a ratou mahi ki te taha ki te Hahi.

E tukutukua tonutia mat ana nga tohu aroha o o koutou hoa i Ingarani; he moni tapiri mo nga tahua whangai minita; he mea mo roto i nga whare karakia, he aha noa, he aha noa. E tangi tahi ana ahau me te iwi o Ahipara mo te matenga o o ratou kai whakaako, ara o Rapata Wharawhara raua ko Inoka Tutangiora.

Ka hui nei tatou kia korerorero, kia whakarongo i nga whakaaro o ia tangata, o ia tangata ki tana mea i kite ai kia tupu ai te mahi a te Hahi. Ekore tetahi tikanga i whakatakotoria e te Hui e whakatuturutia hei Ture ki te kahore e page 5whakaaetia e te Pihopa. Te take i peneitia ai te tikanga, he mea kei rere ke nga tikanga o te Hui Maori i nga tikanga o te Hinota o te Pihopatanga o Akarana.