Manei Maehe, 7, 1864.

Timataia ana e te Pihopa ki te Inoi.

Muri iho ka panuitia ka whakapumautia nga Korero o tera Huihuinga.

I mauria ake, i panuitia e Rev. R. Kawhia te korero a te Komiti i whiriwhiria, hei uiui i te ahua o nga Kura Tamariki o ia kaainga, o ia kaainga, o tenei Pihopatanga.

I mauria ake, i panuitia e Rev. E. B. Clarke te korero a te Komiti i whiriwhiria, hei uiui i te ahua o nga whare Minita o ia Kaainga o ia Kaainga.

I whakaaria e Archdeacon W. L. Williams, i tautokona e Hori Ngangaro;

"Kia tirotirohia e te Komiti Tuuturu te tikanga o nga kupu a te Hinota Nui i te tau 1862, mo te oranga mo te Minita, ina rokohanga e te mate nui ekore ai ia e ahei te hoki ki runga ki tana mahi; mo te pouaru hoki o te Minita, mo ana tamariki pani. Kia rapua hoki e te Komiti Tuuturu he tikanga mo tetahi Tahua mo taua mea: kia korerotia hoki ki te Hinota i te whakaminenga e takoto ake nei."

Whakaaetia ana.

I whakaaria e Rev. R. Kawhia, i tautokona e Rapata Wahawaha;

"Ko Rev. E. B. Clarke, ko Wiremu Pere, ko Renata Atopaki, ko Apiata Parehuia, hei tangata mo te Komiti Tuuturu o tenei Hinota, i tenei tau e haere ake nei;

Whakaaetia ana.

I whakaaria e Hori Mokoera, i tautokona e Rapata Wahawaha;

"Kia puta te whakaaro o nga tangata o ia Pariha o ia Pariha ki o ratou Hinotamana kia homai he mea hei oranga mo ratou."

I tukua ki raro tenei kupu he mea whakaae na te Hinota kia penatia.

I whakaaria e Rev. R. Kawhia, i tautokona e Patara Wahaaruhe;

page 16

"Kia whakaaetia e te Hinota te korero a te Komiti i whiriwhiria hei uiui i te ahua o nga Kura tamariki o ia Kaainga o ia Kaainga."

Whakaaetia ana.

I whakaaria e Rev. R. Kawhia, i tautokona e Rev. T. Huata;

"Kia takoto he kupu ki nga Minita ki nga Kai-whakaako;

1. "Kia tuhituhia katoatia nga tamariki o tena wahi o tena wahi ki te pukapuka.

2. "Kia tohe tonu hoki ki nga Matua tupu ki nga Matua Atua kia tonoa nga tamariki ki te Kura; kia akiakina hoki nga tamariki kia mahia tena mahi."

Whakaaetia ana.

I whakaaria e Rev. E. B. Clarke, i tautokona e Hori Mokoera;

"Kia whakaaetia te korero a te Komiti i whiriwhiria hei uiui i te ahua o nga Whare Minita."

Whakatikaia ana tetahi wahi, muri iho ka whakaaetia.

I whakaaria e Rev. E. B. Clarke, i tautokona e Hori Ngangaro;

"Me akiaki nga tangata o ia Kaainga o ia Kaainga kia hangaa he whare minita i nga kaainga whare kore; kia whakaotia nga whare e hangaa ana, kia whakahoutia nga whare tawhito.

Whakaaetia ana.

I whakaaria e Rev. R. Kawhia, i tautokona e Rev. R. Waitoa hei tapiri mo tera i runga;

"Kia whakaaro nga Pariha katoa ki nga whare Minita kia whai kakahu a roto o aua whare Minita o ia wahi o ia wahi o tenei Pihopatanga."

Whakaaetia ana.

I whakaaria e Rev. T. Huata, i tautokona e Hotene te Horo;

"E mea ana tenei Hinota, he iti rawa te whakaaro o nga tangata o te Hahi i tenei Pihopatanga, ki te nui o nga mea pai kua whakawhiwhia mai nei e te Atua ki a tatou, i te mea kua homai nei e ia te Rongo Pai o te Karaiti ki tenei wahi, na te Karaiti nei hoki te ki: "Kua riro noa atu nei i a koutou me hoatu noa e koutou."

Ko te mea tika hoki tenei kia uaua hoki nga Pariha katoa ki te kohikohi i etahi moni hei kawe i te Rongo Pai ki nga Tauiwi, kia whiwhi tahi ai nga iwi katoa ki nga tohu o te aroha noa o to tatou Atua"

Whakaaetia ana.

I makaa e te Pihopa ma te Hinota e whiriwhiri he kaainga hei whakaminenga mo te Hinota i te tau e takoto ake nei, a, ka kiia ko te Kawakawa, ko te takiwa hei nga ra timatanga o Hanuere.

Whakamutua ana te mahi e te Pihopa ki te Inoi, ki te Whakapainga.

Muri iho ka panuitia, ka whakaaetia nga Korero o tenei huihuinga.