E hoa e te Rangatira o nga Hoia ko te take tenei i purutia ai e au enei ra e rua nei mo aku korero kia puaki ki nga rangatira o te whawhai, no tenei rangi katahi ka puaki taku kupu kia ratou; toku take i haere mai ai ahau ki konei he riri mo te pakanga kia mutu. Na puaki nui ana taku kupu kia ratou na whakaae nui ana ratou ki au. Ko te take o tena kupu aku nei he kupu na te Kawana ma nga Maori ano e hohou te rongo koia au i haere mai ai ki a te Rangitake ki te pane o taku taha ko te Kawana hoki te pane o tau taha nana tenei kupu—ma nga Maori ano e hohou te rongo. Ko ta te Rangitake kupu tenei ki au, ae, kia hoki mai Waitara kia au katahi ka mau te rongo me nga hoia hoki me hoki atu ki Waitoki ko nga Maori o Waikato me hoki ano ki Waikato ko te Rangitake me noho ki nga wahi kihai i pakangatia, me waiho Waitara kia takoto noa ana ma te ture ia e tiaki. Tenei te take i waihotia ai ma te ture e tiaki kia tae atu tetehi kupu kia tau ai te rangatira o te runanga nui o te Kuini mana e ki mai kia ruku ka ruku mana e ki mai kia puea ka puea.

Heoi ano. Ki te mea e pai ana koe tuhia mai kia kite ai au i to painga i to kinonga ranei.