Ki a te Pere,—Tena koe te takawaenga o te Maori o te Pakeha. E hoa kua tae mai tau Nupepa o te 4 o Mei o te matenga o nga Pakeha ki Taranaki. I te ra i tae mai ai i te ngutu awa o Waikato ahau i Taupari; kainga o Wata Kukutai ka kite ahau i tau Nupepa, he kohuru te matenga o nga pakeha, ka ki mai a Wata ki ahau. E pehea, ana tau whakaaro? Ki atu ana ahau ki a ia—E hoa e kore, au e mohio ki te ki he kohuru engari me tatari ahau ki nga pukapuka o uta o Ngatiruani, tera ano pea ta ratou take i riri ai ratou. Heoi ka hoki mai ahau tae mai ki Tamahere ka tae mai hoki nga pukapuka a Ngatiruanui, ka kite au i ta ratou reta e mea ana he pokanoa no Kawana ki te tahi i te rori; 2 ko te unuhanga i te Pou o te rohe o Okurukuru; te 3 ko te tahinga i te rori ki te Papatupu, ko a ratou take tena i kite ai ahau ki ta ratou pukapuka i runga i enei tikanga kua rorerore au ki tau ki ta ratou. E hoa kei mea mai koe, e ngakau rua ana ahau, kaore, he raruraru te take i kore kupu ai ahau; heoi ano ena whakaaro atu ko taku tohe ko Tatairamaka tea tukua kia Kawana tae atu ahau ki Rangiaohia, kia Taati, tea ratou ko ana matua, kia tukua a Tatairamaka kia Kawana, whakaae ana ratou katahi ka korerotia ki a W. Kingi Rangitake ki a Rewi, kia Reihana, kihai ratou i pai ki te whakahoki atu i Tataraimaka, pakeke tonu taua hunga. Heoi tena tea rongo mai ano koe ko taku mahara, kaore ano i motuhake ki tau ranei ki ta Ngatiruanui ranei, ki te noho ranei, ki te tu ranei, ki te pai ranei, ki te kino ranei ranei, engari, kia tino motuhake he kohuru, kua mutu, he take ano kua tu. Heoi na to hoa.