E Koro e Kawana,—-Tena koe i te taenga mai o te Wirihana minita ko tana kupu tenei i haere mai ia kia au kia haere atu ahau ki Akarana kia whakina atu aku whakaaro ki to aroaro kia whakina mai hoki au whakaaro ki toku aroaro heoi ana kupu ka ki atu ahau ki a ia waiho maku e whakaaro i muri ia koe nei. Na i te haerenga atu ka rapu ahau i roto i nga ra i muri i a ia ka whakaaro ahau ki toku ahua whakahihi i runga i nga tohenga a te Runanga, au hoki, ka huri taea noatia te ra ia Wi Maihi kua tae mai, ka tahi ahau ka hiahia kia haere atu otiia mau e pai kia haere atu ahau ka pai kia whaki ahau i te take i tupu ai enei raru e mahia nei i Niu Tireni nei koia taku pai kia o rawa ake to tatou tangata ketanga kua rongo koe i aku take. Te takiwa pai hei haerenga atu moku hei te ra e tu ai to runanga Maori i Kohimarama kia tokomaha ai nga tangata hei titiro i toku he i tou hoki. Heoi ena kupu.

E hoa Kawana, he kupu tenei naku kia rongo ano koe i nga mea e pai nei ahau kia whakina ki to aroaro e kore aku kupu e taea te hoki atu ki muri heoi ano taku ko nga kupu timatanga maku tonu e whaki atu ki to aroaro, ko te timatanga ano heoi tena. Me ui atu ahau i konei kia koe ki te kite koe ia aku tikanga e mau tonu ana pehea to whakaaro ka whakahokia paitia ranei ahau e koe ki taku kainga ka pehea ranei? Whakina mai tau whakaaro kei a koe te tikanga o tau whakaaro.