Sir George Grey N.Z. Maori MS. 89
Mo Te Tainga Moko
Mo Te Tainga Moko
Ko te uhi i whaka koia a raro o te ake kia ko koi, hei tuhituhi, ara, hei whakairoiro.
Ko te whaka iroiro te timatanga o te tanga Moko. Muri atu, ka tango te tohunga ki te uhi, ka tango anoke hoki ki te patu.
Ka tahi ka taia, ko te uhi tapahi te uhi. Matamua, kaore i whaka taratara te mata. Erangi, he uhi mata nui, he uhi mataroa, a mo te taenga ki nga pikonga, ka tango ki tu uhi mata iti, hei whaka tu i nga pikonga i nga karu,
Ko te tainga matamua, he whakarara, he tapatapahi hoki i te peha, i te kiko o te tupapaku kia motu, kia tuwhera ai te awa,
Ka oti te whakarara.
Ka tahi ka tango i te uhi puru, katahi ano te tohunga ka tino tango i te ngarahu me te hungahunga ki te ringa kotahi, Ko te uhi anake ki tetahi ringa, ki te ringa Maui; ki te ringa katau, ko te patu ko te ngarahu, ko te hungahunga ka 3 toru tahi ki te ringa kotahi: ko te uhi pura, he mea whaka taratara te Mata kia mau ai te ngarahu, ko te uhi o muri tenei i te uhi whakarara, i te uhi tapahi;
He uhi mata nui ano. Mo te taenga ki te pukaru, ara ki nga karu, ka tango ano ki te uhi mata iti, kia tika ai te whaka taka i roto i nga piko, kia tika ai hoki te pakati.