.jpg)
Proposals of Mr. Sydney David Taiwhanga, M.H.R., for the Colonization and Settlement of Maori Lands
Ko Te Tiriti O Waitangi. — Te Reo-Maori
Ko Te Tiriti O Waitangi.
Te Reo-Maori.
Ko Wikitoria, te Kuini o Ingarangi, i tana mahara atawhai ki nga Rangatira me nga Hapu o Nui Tireni, i tana hiahia hoki kia tohungia kia ratou o ratou Rangatiratanga, me o ratou whenua a kia mau tonu hoki kia ratou, Kua whakaaro ia he mea tika kia tukua mai tetahi o nga Rangatira hei kaiwhakarite ki nga tangata Maori o Niu Tireni. Kia Whakaaetia e nga Rangatira Maori Te Kawanatanga o te Kuini, ki nga wahi katoa o te whenua nei me nga motu. Na te mea hoki he tokomaha ke nga tangata o tona Iwi kua noho ki tenei whenua, a e haere mai nei. Na ko te Kuini e hiahia ana kia whakaritea te Kawanatanga, kia kaua ai nga kino e puta mai ki nga tangata-Maori ki nge Pakeha e noho ture kore nei.
Na kua pai te Kuini kia tukua ahau, a Wiremu Hopihona, he Kapitana i te Roiara Nawa, hei Kawana mo nga wahi katoa o Nui Tireni, e tukua aianei a mua atu ki te Kuini; E mea atu ana ia ki nga Hapu o Nui Tireni, me nga Rangatira mo enei ture ka korerotia nei.
Tuatahi.
Ko nga Rangatira o te Whakaminenga me nga Rangatira katoa hoki, kihai i uru ki taua Whakaminenga, ka tuku rawa atu ki te Kuini o Ingarangi ake tonu atu Te Kawanatanga katoa o o ratou whenua.
Tuarua.
Ko te Kuini o Ingarangi ka whakarite ka whakaae ki nga Rangatira, ki nga Hapu, ki nga tangata katoa o Niu Tireni, te tino rangatiratanga o o ratou whenua, o ratou kaainga, me o ratou taonga katoa. Otira, ko nga Rangatira katoa atu, ka tuku kia te Kuini te hoko o era wahi whenua ki te pai te tangata nona te whenua, ki te ritenga o te utu e whakaritea ai e ratou ko te kai hoko e meatia nei e te Kuini hei kai hoko mona.
Tuatoru.
Hei whakarite mai hoki tenei mo te whakaaetanga ki te Kawanatanga o te Kuini. Ka tiakina e te Kuini o Ingarangi nga tangata-Maori katoa o Nui Tireni. Ka tukua kia ratou nga tikanga katoa rite tahi kia ana mea ki nga tangata o Ingarangi.
(Signed) William Hobson,
Consul and Lieutenant-Governor.
Na, Ko matou ko nga Rangatira o te Whakaminenga o nga Hapu o Niu Tireni ka huihui nei ki Waitangi. Ko matou hoki ko nga Rangatira o Nui Tireni, ka kite nei i te ritenga o enei kupu, ka tangohia, ka whakaaetia katoatia e matou. Koia ka tohungia nei o matou ingoa o matou tohu.
Ka meatia tenei ki Waitangi i te ono o nga ra o Pepuere i te tau kotahi mano, e waru rau, e wha tekau, o to tatou Ariki.