Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

The Pamphlet Collection of Sir Robert Stout: Volume 63

1. Ko te Iriiringa

1. Ko te Iriiringa.

Ka tono te Karaiti i ana pononga ki te kawe i te rongo pai ki te ao katoa, ko mea hoki ia, kia iriiria a ratou katoa e whakapono ana ki a ia. Na, ko tona tohu o waho, o te iriiringa, koia tenei, "He whakapanga wai ki te ingoa o te Matua, o te Tamaiti, o te Wairua Tapu." Matiu 28. 19. Ko tona "mahi whakawairua o page 18 roto i waiho ai tenei hei tohu," koia tenei, "he horoinga no a tatou kino, he whakahoutanga i a tatou ki roto ki a Ihu Karaiti." Ki tu Nga Mahi 2. 38. "Ka mea atu a Pita ki a ratou, Ripeneta, kia iriiria koutou katoa ki te ingoa o Ihu Karaiti, mo te murunga hara, a ka riro mai ki a koutou te homaitanga o te Wairua Tapu." Me tenei hoki "He aha tau e whakaroa nei? whakatika kia iriiria koe, kia horoia ai ou hara, me karanga ki te ingoa o te Ariki." Nga Mahi 22. 16. I mea hoki te Karaiti "Ko ia e whakapono ana a ka oti te iriiri ka whakaorangia." Maka 16. 16. Otira, "Ki te kahore te tangata te whakawhanautia i te wai, i te Wairua hoki, e kore ia e ahei te tomo ki roto ki te rangatiratanga o te Atua," Hoani 3. 5. No konei tatou matau ai, he mea nui tenei, he mea tapu. E hara hoki ia i ta te tangata whakaritenga, kahore, na te Karaiti ake ano. Me te Karaiti ano i iriiria, waihoki, kia iriiria katoatia ona tangata "Kia penei te whakaritenga i te tikanga katoa." Matiu 3. 15. Ka waiho hoki tenei, hei tikanga e tapoko ai nga tangata ki roto ki tana hahi, pera me nga tangata katoa i whakapono i nga apotoro. "Ko ratou i tango hari i te kupu, i iriiria." Nga Mahi 2. 41. "Ano ka whakapono ratou ki a Piripi e kau whau ana i nga mea o te rangatiratanga o Te Atua, o te ingoa hoki o Ihu Karaiti, ka iriiria ratou, ko nga tangata, ko nga wahine." Nga Mahi 8. 12. "He tokomaha hoki te hunga o Koriniti i whakarongo, a whakapono ana, ka iriiria.' Nga Mahi 18. 8. I mau tonu ano tenei ritenga, a mohoa noa nei. E—ko te tangata, ka pa nei te hiahia ki te Atua ki tona ngakau, ka pena ia me te unaka. "Na, he wai! kei aha hoki a hau te iriiria ai?" Nga Mahi 8. 36. A kia "iriiria ano ia me ana tamariki katoa." 16. 33. No "ka uru ratou ki roto ki te hahi a te Karaiti e kitea ana; a, ka whakaaetia e Te Atua to ratou tatanga ki te Arama tuarua, te kai wawao mo tatou i te kawenata hou nei, ka karangatia hoki tatou kia tango ki nga taonga mo o ratou wairua e rite ana ki a ratou." 2 Katikihama VII. 120.

page 19

Otira, he tangata kuware noa iho e hinu ki te tikanga o tenei Hakarameta. E whakaaro ana ratou ki "te tohu no waho" anake, te mahara ratou, ki te "mahi whakawairua o roto i waiho ai tenei hei tohu." No ratou ka oti te iriiri ki te wai, ka mea ai ratou, he murunga hara tena mo ratou, he whakawhanautanga houtanga hoki. He tino he tenei. E ngari kia iriiria ngatahitia te ngakau me te tinana, ko reira rite ai ka "whakawhanautia koutou ki te wai, ki te Wairua Tapu hoki." Hoani 3. 5. "I iriiria hoki a Hoani ki te wai, ko koutou ia——ka iriiria ki te Wairua Tapu." Nga Mahi 1. 5. E rua ra iriiringa e korerotia ana e te Karaipiture. Ma te iriiri o te tinana kau ka aha ai? Tera ke te mea nui, ko te ngakau kia iriiria. He tangata iriiri hoki a Haimona. I iriiria ia e nga apotoro. Heoi, ka mea atu a Pita ki a ia "Kahore mou wahi, kahore mou rota o tenei kupu; e kore hoki e tika tou ngakau ki te aroaro o Te Atua." Nga Mahi 8. 21. E pena katoa ana hoki te tangata e okioki ana ki runga i te iriiringa kautanga ki te wai. Tokomaha o te hunga iriiri e haere he ana, e noho motu ke ana i Te Atua, e mahi ana i te kino. E maharatia oti e te Atua to ratou iriiringa a te ra whakawa? Kahore ra pea. Ko te tarutaru ratou o tana mara e meinga nei kia hutia ake e nga anahera, ka pupu rawa, ka tahuna. Hei reira ka "puta mai nga anahera, ka wehewehe te hunga kino i roto i te hunga tika, e akiri i a ratou ki roto ki te kapura arai rawa, ko reira te tangihanga me te teteatanga o nga niho." Matiu 13. 49, 50. E rite ana tenei hunga "ki te tangata whakaaro kore i hanga i tana whare ki runga i te onepu; a ka ua te ua, ka puta nga waipuke, pupuhi ana nga hau, pa pu ki taua whare, ka hinga; a, he rahi ano tona hinganga." Matiu 7. 26, 27. Kei pera koe. Otira kia penei tou whakaaro ki a koe, "No ka iriiria ahau, kia whakarerea e ahau te rewera me ana mahi katoa, me nga whakapehapeha o tenei ao kino, me nga hiahia kino o te kikokiko; kia whakapono hoki ahau ki nga tikanga katoa o te karakia a te Karaiti, a, kia whakaritea e ahau te hiahia tapu a Te Atua, a, kia page 20 pumau tonu taku mahi ki ana ture i nga ra katoa o toku oranga ake." 2 Katikihama VII. 121. Penei, ka hanga koe i tou whare ki runga i te kamaka "a hore rawa kia hinga." E tama, "rere atu koe i te riri e haere mai,"—okioki—okioki atu ki runga i te matenga o Ihu Karaiti, a, "mana koutou e iriiri ki te kapura, ki te Wairua Tapu." Matiu 3. 11. Ki te kahore koe e penei, kia rongo mai koe "Tenei ano hoki ka takoto te titaha ki te pakiaka o nga rakau; mo konei, ko nga rakau katoa ekore e whakatupu i te hua pai, e tuakina ana, e maka ana ki te ahi." Matiu 3. 10.