Upoko 35.

Ka korero ano a Iraihu, ka mea,

2 E mea ana koe ka tika tenei a au, e, e puta atu ana taku tikanga i to te Atua?

3 Ka mea koe, Hei aha mou? He aha te pai moku i te pai o oku hara?

4 Maku e whakahoki te kupu ki a koutou, ko ou tangata.

5 Titiro koe ki te rangi, kia kite; kia matakitaki koe ki nga kapua i runga rawa i a koe.

6 Ka hara koe, ka ahatia ia ekoe? e tini haere au kapenga, ka ahatia ia e koe?

7 Ki te mea e tika ana koe, he aha te mea e ho atu ana ki a ia? e whiwhi ranei ia ki te aha i tou ringaringa?

8 Ka mate pea te tangata pena me koe i tou hara; Ma ou tikanga ka ora ai nga tamariki a te tangata.

9 Na te tini o o ratou whakataimaha koia i tangi ai; ka tangi nui ratou, no te mea, he ringaringa no te kaha.

10 Kahore tetahi e mea ana, Keihea te Atua, a toku kaihanga e homai ana i nga waiata i te po;

11 E whakaako nui mai ana ki a tatou, puta atu i tana ki nga kararehe o te whenua, nana nei ano i nui ai to tatou matauranga, i to nga manu o te rangi?

12 Ka tangi ratou i reira, kahore ia tetahi hei homai, hei tangi kau ano i te whakaputanga a nga tangata kino.

13 Ekore te Atua e whakarongo ki te tangi noa, ekore hoki te Atua kaha e anga mai ki reira.

14 Ahakoa mea koe ekore koe e kite i a ia, tena ano te whakawa kei tona aroaro. Kia whakawhirinaki ano koe ki a ia.

15 Na te mea kihai i pena, koia i haere mai ai me tona riri; otira, ekore ia e kite i tona matenga nuitanga.

16 A, e hamama noa ana a Hopa i tona waha; ka tini ana kupu huakore.