The Pamphlet Collection of Sir Robert Stout: Volume 63
Upoko 2
Upoko 2.
Ai tetahi ra ano, ka haere mai nga tamariki o te Atua ki te aroaro o Ihowa, a, ka whakauru mai ano a Hatana i waenganui i a ratou, kia whakakite ano i a ia ki a Ihowa.
2 A, ka mea a Ihowa ki a Hatana, l haere mai koe i hea? Na, ka mea mai a Hatana ki a Ihowa, i te haereere ano i te whenua, i te haere ki runga, i te haere ki raro.
3 A, ka mea a Ihowa ki a Hatana, kua whakaaro tou ngakau ki toku pononga ki a Hopa, ekore e rite ki a ia nga tangata o te whenua, he tangata pakari he tangata tika, e wehi ana ki re Atua e mataku ana ki te kino? e mau tonu ana ia ki te tikanga, ahakoa mea mai koe ki a au kia ririria pakupakutia ia.
4 Na, ka ki mai a Hatana ki a Ihowa, ka mea, He hiako mo te hiako, a, e pai ana te tangata kia ho atu i ana mea katoa kia ora ai tona tinana.
5 Tena ko tenei, whakamarokia tou ringaringa kia pa ki tona wheua ki tona kikokiko, ko reira kanga ai ia ki a koei tou aroaro.
page 36 A, ka mea a Ihowa ki a Hatana, Ka, kei tou ringaringa ia; otira, kei mate ia.
7 ¶ A, ka haere a Hatana i te aroaro o Ihowa, ka whakapangia e ia a Hopa ki te whewhe, ki te raparapa o ona waewae, tae noa ano ki tona tumuaki.
8 A, tango ana ia i te pakoretanga ipu, hei waru i a ia; a, noho iho ana ia ki nga pungarehu.
9 ¶ Na, ka mea mai tona wahine ki a ia, E tohe tonu ana koe ki tou tikanga? kanga ra ki te Atua kia mate koe.
10 A, ka mea atu a Hopa ki a ia, E rite ana tau korero ki ta tetahi o nga wahine kuware e korero nei. E tika koia? Hei pai anake ta tatou e tango ai i te ringaringa o te Atua, aua ranei he kino? A, kihai a Hopa i korero kino i anei mea katoa.
11 ¶ Ano ka rongo nga whanaunga toko toru o Hopa ki tenei kino katoa kua pa ki a ia, ka haere mai ratou i o ratou kainga; ko Iraipaha te Timanaite, ko Pirirara te Huhaite, ko Howhara te Neamataite, kua mea hoki ratou kia haere ki te tangi ki a ia, ki te whakamarie i a ia.
12 A, ka anga ake o ratou kanohi i tawhiti, kihai i matau i a ia; na, ka karanga ratou ka tangi; ka haehae ratou i o ratou kakahu, ka rui i te puehu ki runga ki o ratou upoko ki te rangi ano hoki.
13 A, noho iho ana ratou ko Hopa ki te whenua ewhitu nga ra, ewhitu nga po; a, kihai korero tetahi o ratou ki a ia; i kite hoki ratou e nui pu ana tona pouri.