Ka Holomua o na Kula Kumumua.

O ka rula mau o ka hoonoho papa ana i na haumana, ua hoo-mauia no ia iloko o na makahiki elua i hala o keia kau e olelo ia nei ma keia hoike; a e like me ka nui o ka apo maopopo ia o keia rula e na kumu, a hoohana ia, pela no hoi i loaa ai na hopena holopono. O ka nui o na kumu i hoohana i keia ano hana, ka hoonoho papa i na haumana ma ka lakou hooponopono kula ana, ua pii nui ae, a o ka lakou mau kula hoi aia ma ke kulana holomua. O ke ano hana e alakai ia nei na kula kumumua i keia manawa, ma ka wehewehe pokole, oia keia: Ua hoonohonoho papa ia na haumana ma kela me keia kula, he elua, ekolu, a he eha papa e like me ka ike a me ka makaukau o na haumana :

Papa I. Na Haawina Mau.—Ao-Heluhelu, Helu-naau a me Helu-Kakau, Palapala-Aina, Kakau-Lima a me ka Haku-manao Kakau.

page 4

Papa II. Ao-Heluhelu, Helu-naau, Palapala Aina, a me Kakaulima.

Papa III. Heluhelu, Helukamalii, Kakaulima.

Papa IV. Ma ka Hookuikui, Ao-kakau ma ka papa Pohaku.

Aole hoi i hoonohonoho papaia na keiki opiopio loa, aia a hiki ia lakou ke hookuikui i na mahele o ka huaolelo

E ao mau ia ana no na haumana i ka himeni ke loaa na kumu kupono.

Ua hoomau ia aku no ka hui ana o na Kula Kumu, a ua pii ae no hoi ka makaukau o na Kumu. Ua hoopiha aku ke Kula Kumu e like me ka mea hiki, i ka hakahaka no ka nele i na Kula Ao Kumu, ma ka hoomakaukau ana i na Kumukula e lawe-lawe nei i ka oihana, aka, aole nae he poe kekahi ma waho ae o lakou e hoomakaukau ia ana i hiki ai i ka Papa ke kii aku i ka wa e makemake ia'i.