Na Kula Hanai no na Kaikamahine.

Kula Hanai o na Kaikamahine, Maui Hikina.

Ka nui o na haumana, 51.

Ke mau nei no ka makaukau o keia kula ma na haawina o ka naauao. He maikai ke ao ia ana o na kaikamahine i na ike o ka noho'na, a aole i oi ae ka naauao i ao ia ma na kula e ae o ka aina mamua o ka ike i ao ia ma keia kula. He mea minamina, nae hoi, ka hoopalaleha ana o na makua i ka hookaa mai i ka uku kula o na haumana.

E hoomanao hoi na makua a me na kahu-hanai e hoouna ana i na kaikamahine i ke kula hanai, a e uku ana he $50 a emi iho i ka makahiki, no ka ai, kahi noho a me ke ao ana, aole lakou i hoolawa i na lilo o ka malama ana. Na na uku kokua a ka Papa Hoonaauao, na na kokua mai na hui manawalea a me ka poe manao aloha, na hana kokua wale a na kumu a me kekahi poe e ae, ka uku hoolimalima ole, &c., e hoolawa nei i ke koena nui. Ua kono mai ka pono o na kula a me ka pono o ka hoonaauao ana e hoomaopopo ia ka hookaa ana o na bila kikoo o ke kula. Me he 'la o ke ano maoli o ke kanaka o ka hooemi i ke ano o na pomaikai e loaa wale ana me ka hooikaka a me ka lilo ole.