Ko te whakamahinga a te Kooti Whakawa Whenua Maori e taimaha ana, a, whakahengia ana e te tangata Maori, Pakeha hoki.

Me Penei te Whakatikatikanga o te Kooti Whakawa Whenua Maori.

(1) Kia kotahi te Tiati hei tumuaki, kia rima Tiati takiwa, kia rima Komihana takiwa. (2) Ko nga whenua katoa e kawea ana kia whakawakia me matua whakaatu nga tikanga e te Komiti me te Komihana o te takiwa, ma raua e tuku atu a raua ripoata i te tuatahi mo aua whenua. (3.) I roto i aua ripoata me whakaatu nga rohe o te whenua nga rohe o nga hapu me nga iwi, me nga rarangi ingoa. (4.) Ki te mea kaore he whakahetanga i taua ripoata me tuhi te take ki te whenua me ta raua ripoata i whakaatu ai. (5) Mehemea, e whakahengia ana, ma te Tiati Timuaki, me nga ateha tokorua, kotahi mo ia taha e whakarite te mea e tautohea ana. (6.) Ki te mea kahore i paingia te whakatau a te Kooti Takiwa, ka ahei te Poati Whenua Maori ki te whakaae kia kootitia tuaruatia i te aroaro o te Tiati Tumuaki, me tetahi Tiati Takiwa me nga ateha tokorua. (7.) Ko nga Komihana, hei Tiamana mo nga Komiti Takiwa katoa, a ka mahi tahi ratou ko nga Komiti, i te whakahaere tikanga mo nga whenua. (8.) Ma te Komihana e utu nga moni reti, me nga moni ke atu e puta mai ana i roto i tona takiwa, ki nga tangata mo ratou aua moni. (9.) Nga mea katoa e uru ana nga korero o te ture, e pa ana ki te taha Maori anake, ma te Poati Whenua Maori, me te Kooti Whenua Maori e whakatau. (10.) E kore e tika kia whakakorea atu tetahi Tiati, Komihana ranei, ma te Poati Whenua Maori e whakaae i te tuatahi, a kia marama ano hoki te take.