Ture o te tau 1873.

I te tau 1873 i tahuri ano te Paremete ki te mahi tikanga. Kua kitea hoki ko te haere tonu te mahi muru me te tahae i nga moni o te iwi me ka waiho tonu ma nga rangatira e whakahaere nga hoko o nga whenua o te iwi me te kore mohio atu o te iwi no ratou ra te whenua kei te hokona kei te ahatia ranei. No te Ture Whenua Maori o te tau 1873 katahi ka tino tuturu nga take paanga o ia tangata o ia tangata. I te Ture o te tau 1865 i whakahuatia ko te ingoa nui o te iwi, no tenei katahi ka whakaingoatia rawatia nga tangata katoa e whaipaanga ana. Ko ia tangata wahine tamaiti ranei i whakahuatia tona whaitaketanga ki te whenua. Ki ta te Pakeha tikanga ko te matua ko to mua ranei o te whanau kotahi ko ia te tangata tika ki te whenua. Ko tenei tu tikanga i toia rawatia a tae rawa atu ki nga tamariki kaore ano ra kia whanau noa whakaurua ana ratou ki te whenua. Ko nga ingoa mo aua tamariki kaore ano ra kia whanau noa i tapaa ki te ingoa taane wahine hoki. I ruuga i nga korero a nga Pakeha me nga Maori ano hoki, kaore tenei tu tikanga i nga iwi Maori, ara te whaitaketanga motuhake o te tangata kotahi ki te whenua.

Takitahi nei nga whaipaanga pera i taea te whakahua mai. Na ko era he mea hoatu ma tetahi rangatira mo tetahi mahi nui i mahia e ia ake, hei utu ranei mo tetahi mahi kino i pa ki a ia ake. Na ko aua tu whaitaketanga pera kihai i roa kua riro ma tana whanau ma ona uri ranei a tau iho ki tona hapu i muri i a ia. Na te Ture o te tau 1873 i whakarereke nga tiwhikete i whakaputaina i raro i nga ture o mua atu a tapaina ketia ana he whakamaharatanga take. Na i roto i aua whakamaharatanga take i whakahuatia katoatia nga ingoa o nga tangata me nga wahine me nga tamariki o te iwi katoa o te hapu ranei i whaitake ki taua whenua. Na i runga i taua huarahi kihai i mohiotia te paanga o ia tangata wahine tamaiti ranei, no reira ka meingatia kia kaua e mana te kirimene, riihi, hoko, mokete ranei mehemea kaore i hainatia e nga tangata katoa i whaka huatia ra o ratou ingoa i roto i te whakamaharatanga take, me nga tikanga ano o te ture whakarite i ona huarahi hei mahinga me ona kaititiro me ona ritenga katoa. Na taua ture i timata taua tikanga hou ara te whaitaketanga motuhake o ia tangata ake, kaore nei i pera i mua atu, a na taua tikanga i puta ake ai nga raruraru i runga i nga hoko ki nga Pakeha, na tera ano hoki i taimaha ai nga mahi whakanohonoho i Aotearoa.

I runga i nga whaikorero a te hunga i kite haere i nga mahinga o nga Ture whenua Maori o te timatanga mai koia tonu ko taua tikanga ra te take i puta mai ai nga raruraru katoa.

Na te tohe tonu ki te whakatau motuhake i nga whaitaketanga whenua i raruraru ai, ko tona tikanga ke hoki he whaitaketanga no te iwi.