Ki a Wiremu Hiria Onero, Kawana o te Koroni o Niu Tireni.

I runga i te mana i runga hoki i te tikanga o nga kupu tohutohu mai o roto te Komihana i tukuna mai nei e koe e te Kawana, kua whiriwhiria a matou nga take i whakaritea, mai ra, a tenei te tukuna atu nei ta matou ripoata mo runga mo aua putake —

page 2

I runga i ta matou whakahaerenga i ta matou mahi i haere matou ki te nuinga o nga waahi katoa o Aotearoa. I tu ta matou Komihana ki Kihipane, Akarana, Kemureti, Kawakawa, Waimate ki Raro, Te Ahuahu, Whangarei, Otorohanga, Nuparemete (Ngamotu), Parihaka, Te Hawera, Whanganui, Pamutana Nota (Ki Raro), Tenewaka, Waipawa, Nepia, Kereitaone, Otaki, me Poneke.

Kua patapataia e maton etahi tangata tokomaha, Pakeha Maori hoki i maharatia e matou era e kaha ki te tuku mai i etahi kupu whaitikanga. I tae mai ano nga Rangatira Maori i te aroaro o o ratou iwi, a i korero nui mai mo runga mo nga take e whiriwhiria ana. Kua whaki katoa mai nga kaikorero nga iwi tonu ano ranei o enei iwi, ara, a Ngapuhi, Ngatipaoa, Waikato, Ngatirerangi, Te Arawa, Te Urewera, Ngatituwharetoa, Ngatimaniapoto, Ngatiporou, Rongo-whakaata, Ngatitama, Ngatiruanui, Ngarauru, Ngatihau, Ngatiraukawa, Ngatiapa, Muaupoko, Rangitane, Ngatitoa, kua whakaatu mai ratou katoa i a ratou hiahia, me o ratou whakaaro mo runga mo nga ture whenua Maori me nga Kooti Whenua Maori. Tenei te tukuna tahitia atu nei te mapi o Aotearoa me te whakaatu tahi atu o te ara i haere ai matou me nga kainga i tae ai matou, me nga rohe tawhito o nga whenua o nga iwi, me te kape o te Tiriti o Waitangi, me nga tekiona 71, 72, o " Te Ture Whakamana o Te Koroni, 1852 " (15 me 16 Vict., c. 72) e pa ana ki nga whenua Maori me nga whakahaere o nga Maori i a ratou ake ano.

I mihi nui mai te iwi ki a matou i nga wahi katoa i tae ai matou. I korero pai mai nga iwi me ta ratou whakahonore atu ki te Kawana mo tona tukunga atu i te Komihana kia kite i a ratou kia patai atu hoki i o ratou nei hiahia. I runga i tenei huarahi hou ka mahara ratou tera pea e puta mai he pai, ko a ratou whaikorero hoki i haere i runga i ta ratou mahara e tino hiahia ana te Kawanatanga ki te whiriwhiri i nga tikanga o nga auwetanga o te iwi, kia kitea ai he huarahi hei whakaora i o ratou mate.

Ko nga Pakeha e whaitikanga e whaimatauranga ana mo runga mo nga whakahaere i nga whenua Maori, me etahi ano o nga tino roia kua whaki katoa mai i a ratou korero kua awhina mai hoki i ta matou mahi.

Kua whiriwhiria e matou nga tikanga katoa i taea ai e matou i runga i to matou whakaaro he tino putake taimaha rawa enei i tukuna mai nei hei mahi ma matou, no reira matou i ata patai ai ki nga hunga whai matauranga mo runga mo aua take. Kua ata tirohia hoki e matou nga pukapuka katoa o te Paremete. E mohio ana ano matou kihai i tino tae rawa ta matou mahi ki tona tikanga rawatanga, me te maha o nga mahara rereke a te tangata mo runga mo aua putake, otira e tukuna atu ana e matou tenei ta matou mahi ki a koe e te Kawana i runga ra i to matou hiahia kia kitea etahi mea o roto e puta atu ai pea he maramatanga ki te Paremete o tenei Koroni.