[Translation. ]
No. 644.—Pitihana a Wiremu Neera te Kanae me etahi atu e 50.

E tono ana nga kai-pitihana kia puta atu he utu ki a ratou mo tetahi whenua i roto i Arataura Poraka, Porirua, e kiia ana e ratou i tangohia hetia mai i a ratou.

Kua whakahaua ahau kia ki peuei: E ki ana nga kai-pitihana kua tangohia e te Karauna te wahi o taua whenua ki te taha ki te Tonga o te Whenua Rahui Maori i Porirua hei whenua mo te Karauna, a ko te tikanga he wahi tonu tera no te Whenua Rahui Maori i Porirua. Ko te tino taunga o te take katoa o tenei pitihana kei runga i te wahi i takoto tuturu ai te wahi e kiia nei ko Te Arataura. I runga i te mapi i hainatia e Ta Hori Kerei, ko ia nei te Kawana i taua wa, kahore he paanga o nga Maori ki te whenua; otiia i runga i te whakaaturanga e mau ana i roto i te pukapuka tuku i te whenua e ki ana ko Arataura te rohe ki te taha ki te Tonga, heoi kei te he pea te mapi. No te tau 1847 i whakahaerea ai taua tuku, a e kore te Komiti e ahei ki te whakatau i te tikanga o taua mea, engari me matua whakahaere tetahi tikanga ata uiui i tona tikanga i te tuatahi. Heoi ko te kupu a te Komiti me whakatu tetahi tangata tika tino mohio hoki kia haere ki runga ki te whenua kia tutaki atu ki reira ki nga tangata Maori kaumatua a kia ata tirohia mehemea kei te he te rohe. A mehemea ka kitea he tika i he me whakaputa he moni hei utu ki nga Maori.