[Translation. ]
No. 367.—Pitihana o Kipa te Whatanui, o Otaki (No. 2).

E inoi ana te kai-pitihana kia utua atu tona ruihitanga mo runga mo te piihi whenua e mohiotia nei te ingoa ko Te Waka, he wahi no Ngakaroro Nama 2 Poraka, e ki ana hoki ia na te whakahaere a te Kooti Whenua Maori i kore atu ai taua piihi whenua i a ia.

Kua whakahaua ahau kia ki penei: Me whakahua ano e te Komiti nga kupu i whakapuakina e te Komiti mo runga mo tetahi pitihana penei ano te ahua i te tau 1891, ara: "Kahore i ruarua te whakaaro i tau ano tetahi mate ki runga ki te kai-pitihana i nga mahi a te Kooti Whenua Maori. Na ko nga take tenei. No te tahi o nga ra o Aperira, 1874, ka whakawakia te Ngakaroro Poraka Nama 2, e te Kooti Whenua Maori i whakaaetia ano te tika o te take a te kai-pitihana ki te Waka. A i runga i tana i rongo ai heoi to mahi mana he whakahau kia ruritia taua wahi a ka mau mai ano i tana keehi ki te aroaro o te Kooti kei reira ka whakatuturutia tana take ki a ia. No te 2 o nga o Aperira, 1874, ka tukuna te rarangi ingoa o nga tangata whai take ki te Poraka kia tuhituhia ki roto ki nga pukapuka o te Kooti, heoi mahue ake te ingoa o Kipa te Whatanui. I muri iho he maha nga mauranga mai e te kai-pitihana i tana keehi ki te aroaro o te Kooti erangi kihai i whakahaerea a te Kooti no te mea kihai tona ingoa i uru ki te rarangi ingoa o nga tangata whai take. E whakatikaina ana te keehi a te kai-pitihana e nga pukapuka o nga tari, a kei etahi whakaaetia kia tukuna tetahi ora ki a ia. Akuanei i runga i te whiriwhiringa i enei take katoa e te Komiti e whakaaro ana ratou me tuku tenei pitihana ki te Kawanatanga kia uiuia nga tikanga me te ata whiriwhiri hoki e ratou i enei take."