[Translation.]
No. 47, Sess. II.—Pukapuka-inoi a Atanatiu te Kairangi.
E Ki ana te kai-pitihana ko tetahi moutere e karangatia nei ko Paruparu e takoto ana ki te pito ki te rawhiti o te Waipounamu he moutere nana, no te hokonga o nga whenua i ia takiwa e te Makarini, i mahue taua moutere ki waho o te hoko, no te mea he uranga no nga poti, he urupa hoki no o ratou tupapaku, e ki ana te kai-pitihana he maha ana tononga ki te Kawanatanga mo tenei Moutere, otira kihai te Kawanatanga i aha. E inoi ana ia kia whakahokia mai ki aia.
Kua whakahaua ahau kia ki penei:—
Ko te tiiti hoko tuatahi a Ngatitoa kahore he kupu hoko i roto mo taua moutere e whakahuatia nei i roto i te pitihana, erangi ano te hokonga o te tuawhenua i te Waipounamu.
Kc te tiiti tuarua a Ngatitoa e tino whakahua ana i nga poraka whenua o te tuawhenua i hokona e ratou kahore rawa he kupu hoko mo nga moutere i roto.
Na mo runga i te taha ki te kai-pitihana e tika ana i tino whakaritea i runga i tetahi korero tanga ki te iwi o Ngatitoa i Porirua, me rahui enei moutere ma ratou me a ratou tamariki, me o ratou uri e noho ana i te Waipounamu. E tika rawa ana tenei korero inahoki nga korero whakatika a Ta Hori Kerei, K.C.B., M.H.R., koia hoki te tangata nana i hoko.
Na e penei ana te whakaaro o ta koutou Komiti ko tenei moutere ko Paruparu me etahi atu moutere e tata ana ki te Waipounamu me whakahoki ki nga uri o Ngatitoa ki nga uri o nga tangata no ratou ana moutere i mua.