[Translation.]
No. 160, Session II.—Te Pukapuka-inoi a Te Oti Pita Mutu me etahi atu e 25 (No. 1).

E ki ana nga kai-pitihana na te Kooti whenua Maori i whakatau ki a ratou i te tau 1860 etahi roto hei rahui hiinga ika ma ratou. E tono ana ratou ko te whenua i roto i nga moana ka whakahuatia ake nei me hoatu ki a ratou ara: Ohuapounamu, Torotoroa, me Waimaiaia—te take mo runga i nga tikanga o roto i te pukapuka-hoko a Ngaitahu i te tau 1848, i mea te Kooti e tika ana ratou ki nga wai-tuna, whakataua ana nga rahui e 20 eka o Torotoroa, 15 eka o Ohuapounamu, 10 eka o Waimaiaia, 10 eka o Rakahuri. Ko enei rahui i whakataua hei wahi tuturu hei hiinga ika mo ratou. Ka nui te ora o nga kai-pitihana i nga tuna, i nga patiki, me nga manga e mau ana i reira, kaore ratou e hoko miiti ana i te nui o te ika. Na ko nga pakeha mo te pai ano ki a ratou kua tuku i te wai o aua roto a kua mate nga tuna me etahi atu ika heoi kua tahuri ratou inaianei ki te hoko i te miiti a te pakeha. Na te Rori Poati o Rangiora i keri kia puta te wai o aua roto tono noa ratou kia kaua heoi ano te ki mai a nga tangata o taua Poati kia hamenetia ratou. I whai kupu ratou ki a te Roretana ki ana ia e tika ana ratou engari kaua e araitia nga ture keri awa. He roa nga korero a nga kai-pitihana ki a whakaarohia o ratou take e te Whare.

Kua whakahaua ahau kia ki penei:—

E pouri ana te Komiti mo te poto o te takiwa i a ratou hei tirotirohanga pai ma ratou e tika ai te whakatau kupu mo runga i nga putake korero o roto i tenei pitihana.