[Translation.]
Ko te Kupu a te Komiti mo runga i te Pukapuka-inoi a W. H. Taipari.

E whakahuatia ana e te kai-inoi tetahi Panuitanga a te Huparitenete o te Porowini o Akarana he whakaatu i te utu ki te tangata mana e whakakite mai he whenua e nui ai te koura. E ki ana ia nana i kite te whenua koura i Hauraki, na tana whakahaere i whakatuwheratia ai. Koia i tono ai ia kia utua ki a ia te moni e £5,000.

Kua whakahaua ahau kia ki penei atu ki te Whare:—

E tika ana i whakaaria ano e te Huparitenete o Akarana te utu e £5,000 mo te whakakitenga i tetahi whenua e nui ai te koura i roto i te Porowini o Akaraua. Na, i muri iho o te whakatuwheratanga o te Whenua Koura i Hauraki he maha nga tono a nga tangata i ki na ratou te koura tuatahi i kite. I whakaturia tetahi Runanga Komihana e te Huparitenete i te tau 1870 ki te whiriwhiri i aua tono, a kiia ana e nga Komihana kahore tetahi o aua kai-tono (tae atu ki a W. H. Taipari te kai-inoi nei) i tika i runga i te tikanga o te kitenga tuatahi o te koura; engari i tino whai kupu nga komihana mo nga mahi a te kai-inoi me tana uaua hoki, a i tono ano ratou kia utua ki a ia nga moni e £300.

E whakaaro ana te Komiti e kore e taea te whakaaro kua tino ea nga mahi a te kai-inoi i runga i te whakatuwheratanga, i runga i tana whakahaere, o nga whenua o Hauraki kia mahia mo te koura i te mea hoki ka nui te uaua o etahi ki te pupuri, koia i mea ai te Komiti ma te Whare ma te Kawanatanga hoki e ata whiriwhiri pai te tono a te kai-inoi. Tenei ano tetahi kupu a te Komiti, kua tata tenei ki te kotahi tekau nga tau e takoto ana te tono a te kai-inoi, koia i whakaarohia ai kia tere tonu te whaitikanga a te Kawanatanga mo tenei mea i te wa kei konei, kei Poneke nei, te kai-inoi.

page 9