[Translation.]
Ko te kupu a te Komiti mo runga i te Pukapuka-inoi a Heta Tiki.
E ki ana te kai-inoi kei tetahi pakeha, ko John Harding te ingoa, te Karauna karaati o tetahi wahi o to ratou whenua o to ratou kainga a whakataua iho te tika ki taua pakeha i te Hupirimi Kooti te take he he i roto i te karaati. I whakamutua e John Harding te whakawakanga kia ahei ai tetahi whakarite-ritenga ma te Kawanatanga ekore ai e pana atu nga kai-inoi i to ratou kainga. Na te korenga i oti taua whakariteritenga e mea ana a Harding kia whakamana te whakataunga a te Kooti. E tono ana nga kai-inoi kia whakaorangia ratou e te Whare.
Kua whakahaua ahau kia ki penei atu ki te Whare:—
E kitea ana i runga i te korero a Te Karaka i pohehetia te whakaurunga o tetahi wahi o te kainga o nga kai-inoi ki roto ki tetahi Karauna karaati ki tetahi pakeha a no reira i pa ai tetahi tino mate ki te kai-inoi. E whakaaro ana te Komiti na te Kawanatanga taua pohehe a ma te Kawanatanga e whakarite tetahi tikanga e whakatikaia ai.
John Bryce,
Tumuaki.