[Translation.]
Ko te kupu a te Komiti mo runga i nga Pukapuka-inoi a Renata Kawepo ratou ko ona hoa e 790, A Piripi Ropata hoki ratou ko ona hoa e 200.
E 791 nga Maori na ratou i tuhituhi enei Pukapuka-inoi, he whakaatu mai i nga whakaaro o tetahi hui nui o nga Maori i turia i tera tau; me etahi putake hoki i oti i tetahi hui i muri ake nei. E ki ana nga kai-inoi he mea pai kia huihui nga Rangatira Maori ki te korero i nga mea e tau ana ki te iwi Maori; e whakaaro ana ratou kia whakatakomahatia nga Mema Maori ki roto ki te Runanga Nui. E whakaatu ana ratou i to ratou pouri mo te raruraru o Te Ture Whenua Maori o naianei, me nga mea i mahia i runga i nga tikanga o taua Ture a e inoi ana ratou kia whakakorea atu. I runga i ta ratou tono kia mahia tetahi Ture pai atu e whakaatu ana ratou i to ratou whakaaro kia rite tonu te tu o nga Kai-whakarite Whakawa ki nga Kai-whakarite Whakawa o era atu Kooti, kia kaua he mana a te Kawanatanga e tau ki a ratou.
Kua whakahaua ahau kia ki penei atu ahau ki te Whare:—
He mea pai kia ata whiriwhiria e te Whare nga korero whai tikanga e whakahuatia ana i roto i nga Pukapuka-inoi, engari kahore te Komiti i whakaaro he mahi tuturu ma ratou kia whai kupu tohu-tohu ratou mo nga mea maha e tau ana ki nga tikanga whakahaere e whakahuatia ana e nga kai-inoi.
Inahoki he nui te whakamarama o te Pukapuka-inoi i nga whakaaro o nga Maori mo te ahua mo nga Ture e tau ana ki nga whenua Maori e mea atu ana te Komiti he mea pai kia taia te Pukapuka-inoi.
I runga i ta ratou tohutohu atu kia taia te Pukapuka-inoi e whakaputa ana te Komiti i ta ratou whakahe mo te kupu o taua Pukapuka-inoi e anga whakahe ana ki tetahi Mema o tenei Whare, a e tumanako ana to ratou whakaaro ka kore nga Maori e whakahua i aua tu kupu ina tuku Pukapuka-inoi mai ratou ki te Runanga.
John Bryce,
Tumuaki.