[Translation.]
Ko te Kupu a te Komiti mo runga i te Pukapuka-inoi a Henare Tomoana me ona hoa e 33.

E ki ana nga kai-inoi i haere atu ratou ko, etahi tangata Maori i mua tata atu nei ki Heretaunga (Hastings) e tata ana ki Nepia ki te tuhituhi i o ratou ingoa ki etahi pukapuka a ko te take i kore ai ratou e haere ki Nepia he wehi kei whakawaia ratou e te waipiro.

E ki ana ratou ahakoa i maha nga tono a to ratou roia a Te Hiana (Mr. Sheehan) kia haere atu he Kai-whakawa ki te titiro i te tuhituhinga o o ratou ingoa, kihai i taea a no reira ka nui te raruraru me te mate i pa ki nga kai-inoi me etahi atu.

E whakaatu ana nga kai-inoi i ta ratou whakaaro ko te take i kore ai nga apiha i tae ki Heretaunga he mea kia kore ai ratou (nga kai-inoi) e whiwhi ki te moni hei whakahaere i etahi whakawa i roto i te Hupirimi Kooti a e tono ana ratou kia riria aua apiha mo taua mahi whakaporangi a ratou.

page 26

Kua whakahaua ahau kia ki penei atu ki to Whare:—E mea ana "Te Ture Arai i nga tuku hei nga Whenua Maori, 1870," e pai ana ma te Kawana i roto i tona Runanga Whakahaere e whakatakoto etahi tikanga hei tohutohu ki nga Komihana Tiaki i runga i te ritenga o ta ratou mahi. E whakaaro ana te Komiti me whakaputa inaianei tonu he tikanga pera me panui ki te Kahiti.

Mo runga i te mahi a nga Kai-whakawa Tuturu e titiro nei i nga tuhinga ingoa ki nga pukapuka i runga i nga tikanga o "Te Ture Whenua Maori, 1873," e whakaaro ana te Komiti me whakaputa he kupu tohutohu ki nga Kai-whakawa Tuturu kia titiro ratou i nga tuhituhinga ingoa ki nga pukapuka i nga wa, i nga kainga e panuatia ai kia kite ai te katoa.

E whakaaro ana hoki te Komiti mo runga i tenei mea i whakahuatia nei e nga kai-inoi i mahi nga Apiha i runga i nga kupu tohutohu i whakaputaina ki a ratou.