[Translation.]
Ko te Kupu a te Komiti mo runga i te Pukapuka-inoi a Roera Hukiki me ona hoa e 2.

E ki ana nga kai-inoi i whakataua e te Kooti Whakawa Whenua Maori i te 21 o Maehe, 1874, ki Otaki, tetahi kupu mo tetahi whenua a kahore ratou i marama ki taua whakataunga, a tono ana ratou i roto i te wa i whakaritea e te ture kia whakawakia tuaruatia, engari na tetahi he i roto i nga pukapuka na tetahi pohehe pea a nga Apiha o te Kawanatanga i kore ai e whakaaetia taua whakawa tuarua. E ki ana nga kai-inoi he tangata hapai tonu ratou i te ture o tua iho, a ka nui ta ratou tohe kia whakawakia tuaruatia taua whenua, a ma ratou e utu nga utu katoa o te whakawakanga, a mehemea ka tukua tetahi takiwa mo ratou kia ahei ai ratou ki te whakatuturu i to ratou tika ka whakaaetia e ratou ka hapainga e ratou te whakataunga a te Kooti.

Kua whakahaua ahau kia ki penei atu ki te Whare:—Ko te tino mea e kimihia i roto i tenei pukapuka-inoi he titiro mehemea i puta he tono ma ratou, i roto i te wa e whakaritea ana e te ture, kia whakawakia tuaruatia ta ratou tono ki te whenua i whakahuatia i roto i te pukapuka inoi.

Kahore i whai takiwa nga kai-inoi ki te whakapuaki kupu mo runga i taua tono a ratou e whakahuatia nei e ratou otiia kahore e marama ana i runga i nga kupu i whakapuakina ki te awaro o te Komiti kahore taua tono i whakaputaina.

E whakaaro ana te Komiti ma te Kawanatanga tenei mea e kimi i te mutunga o te Runanga a mehemea ka kitea i tino tae atu taua tono ka ahei te Kawanatanga ki te whakaae kia whakawakia tuaruatia mehemea ia e marama ana kia ratou kia whakaaetia.