[Translation.]
Ko te Kupu a te Komiti mo runga i te Pukapuka-inoi a Aperahama Tupou me ona hoa e 65.

E ki ana nga kai-inoi kahore i tika te whakahaeretanga o o ratou whenua; a kua tangohia he whenua i a ratou hei utu kai ma etahi.

E ki ana ratou kahore ratou i tuhi i o ratou ingoa ki te pukapuka o te whakatuwheratanga o te whenua-koura i Ohinemuri, a e inoi ana ratou kia whiriwhiria tikatia paitia hoki o ratou tikanga.

Kua whakahaua ahau kia ki penei atu ki te Whare:—I tukua mai tetahi pukapuka-inoi penei me tenei i tera tau a ki ana te Komiti mo nga mea Maori o reira kia whakawateatia he takiwa kia ahei ai te whakawakanga o nga take o nga tangata e ki ana no ratou te whenua e tautohetia nei, ki te aroaro o te Kooti Whakawa Whenua Maori.

Otira kahore pea i mahia he tikanga i runga i taua kupu, ahakoa nga tono a etahi o nga kai-inoi.

E whakaaro ana tenei Komiti ka rite katoa nga tikanga o tenei mea e te kupu a te Komiti mo nga mea Maori o tera tau. Ka marama noa iho te ngakau o nga kai-inoi mehemea ka tukua a ratou tono ki te Kooti.

E mea ana hoki te Komiti kia kaua e tukua he takiwa roa Ma pahure mua mai o te tunga o te Kooti, notemea ma te Kooti kia turia, kia kimihia hoki i runga i te tikanga o te ture ko wai ma ranei nga tangata no ratou nga whenua e tautohetia ana, ka kore katoa ai nga take pouri raruraru hoki.