Te Iwi O Ngaitahu.

Tame Parata (mema Maori mo Te Waipounamu).—Ka patai ahau ki te Minita mo nga Reriwe, Mehemea kua whiriwhiria e ia te pitihana a te Iwi o Ngaitahu, Te Waipounamu, e tono nei kia whakaitia te utu o nga tikiti o te tereina ina haere ratou ki nga Kooti Whenua Maori; a mehemea kua whiriwhiria e ia taua tono, e hia nga moni e whakatakangia atu e ia i runga i ia tikiti hei whakarite i te inoi a nga kai-pitihana?

Te Karimana (Hon. Mr. Cadman, Minita mo nga Reriwe).—Ae; kua whiriwhiria taua tono a nga Maori e mea nei kia whakamamatia te utu mo ratou i runga i te tereina ina haere ratou ki nga Kooti Whenua Maori Ko te mahara o te Kawanatanga, i te mea he nui rawa, nga moni a nga Maori e pau ana i te haereerenga ki aua Kooti, he mea tika kia whakaaetia atu taua tono a kia hanga he tikanga e mama ai te utu i runga i te tereina ma nga tangata e haere ana ki nga Kooti, penei ano me te utu tereina mo nga Maori e haere tokonui ana ki aaga tangihanga tupapaku; engari taro ake nei ka panuitia ki roto ki te Kahiti nga rarangi whakaatu atu i nga utu tereina mo nga Maori e haere tokonui ana ki aua tu mahi kua korerotia ake nei, a ma tera, ki taku whakaaro, e rite ai te hiahia o nga kai-pitihana.