No te hawhe-paahi i te rua karaka ka noho te Tumuaki ki runga ki tono nohoanga.

Ka karakia te Whare.

Ka mutu nga motini me etahi atu mea te whakahaere e te Whare ka tae ki nga patai.

Rahui Kura Maori I Whakarewa.

Tame Parata (mema Maori mo Te Waipounamu). — Ka patai ahau ki te Pirimia, Mehemea tera ranei e kokiritia e ia he Pire ki te Whare, i tenei tuunga o te Paremete, hei whakatakoto tikanga mo nga whenua, e mohiotia nei tona ingoa ko Whakarewa, i rahuitia mo te kura Maori i Motueka, Takiwa Porowinitanga o Whakatu? Ka maha aku uinga i tenei patai, i ia tuunga o te Paremete, a ki taku mahara i whakaae te Kawanatanga i tera huihuinga o te Paremete ki te kokiri i tetahi Pire ki te Whare hei whakahaere i aua whenua, a ki taku whakaaro kua taka te wa e whakatutukitia ai nga tikanga mo taua whenua.

Timi Kara (Hon. Mr. Carroll, Hekeretari mo te Koroni).—E rite tahi ana te ahua o te rahui i Whakarewa ki te ahua o te rahui i Porirua i uru nei ki te Hupirimi Kooti. E kore e tika kia takitahitia te whakahaere a te Kawanatanga. mo enei tu whenua, engari tera pea e taea he tikanga mehemea ka whakatoputia te whakahaere mo aua whenua. Otira kei te whiriwhiri te Kawanatanga i tetahi huarahi e taea ai te hanga he ture mo aua tu whenua.

Komihana Mo Nga Maori Kore-Whenua.

Tame Parata (mema Maori mo Te Waipounamu).—Ka patai ahau ki te Kawanatanga, —(1.) Awhea whakatakotoria ai ki runga ki te teepu o te Whare te ripoata a nga Komihana mo nga Maori Kore-whenua o Te Waipounamu? (2.) Mehemea ranei kua whakaaetia e te Kawanatanga te tono a aua Komihana kia hoatu ano etahi whenua hei whakarite i nga kereeme a nga tangata Maori Korewhenua o Te Waipounamu kaore nei ano i whakaratoa ki te whenua i te mea kua pau i etahi nga whenua i wehea e te Kawanatanga mo taua mahi.

Timi Kara (Hon. Mr. Carroll, mo te Minita mo nga Whenua).—Kua oti te ripoata a nga Komihana, a tera taua ripoata e whakatakotoria ki runga i te teepu o te Whare i roto i nga ra e rua e toru ranei e haere ake nei.

Ka haere tonu te mahi a te Whare i etahi atu patai a nga mema Pakeha. Ka mutu era ka mahia ko etahi Pire.

page 25

No te rima meneti ki te tekau ma rua o nga haora i te weherua i te po ka hiki te Whare.