Pire Whenua Maori.

No tenei ra ka whiriwhiria nga menemana i hanga e te Kaunihera mo tenei Pire, ko enei e whai ake nei nga korero a—

Henare Kaihau (mema Maori o te Tai Hauauru).—Kaore rawa atu ahau e mohio ana ki te take i tahuri ai nga mema honore ki te arai i te paahitanga o tenei Pire, i te mea ko te tino mea nui o nga Pire Maori kua waihotia atu mo tera tuunga o te Paremete. Ara, te tikanga e mea nei me whakatu he Kaunihera hei whakahaere i nga whenua Maori. I mahara hoki ahau kua whakaaetia e nga mema honore me paahi he Pire poto hei whakamutu i te hoko a te Karauna i nga whenua Maori; e tangi nei nga Maori i nga ra katoa. Tae mai ki naianei i mahara tonu ahau e whakaae ana te Kawanatanga me ona kai-tautoko, me te nuinga o nga mema o te taha Apitihana, kia paahitia tetahi Pire poto penei, hei whakamutu i te hoko a te Karauna i nga whenua Maori kia paahitia ra ano te Pire o tenei Paremete o tera tau. Mehemea ki te whakaaetia te menemana a te mema honore mo Patea, kia patua a tekiona 3 o te Pire nei, heoi ano kore kau noa iho he painga i mahia ai tena Pire. Ko wai te tangata e ora i tena Pire? Ki te kore e whakaotia i runga i nga kupu tuatahi, ka noho mate tonu nga Maori katoa o te takiwa o te Tai Tokerau me te Tai Hauauru, ara, te nuinga o nga iwi Maori o te Motu nei, ka mate tonu i taua mahi hoko whenua, kaore rawa e ora. Ka tino tono atu ahau ki te mema mo Patea kia unuhia e ia tana menemana, a kia tahuri mai ia ki te awhina i te Pire nei kia paahitia atu hei arai i te hoko whenua Maori kia mutu ai tera mahi.