Penihana Mo Nga Kaumatua Maori.

Tame Parata (mema Maori mo Te Waipounamu).—Ka patai ahau ki te Minita mo te Taha Maori, Mehemea ranei kua whakaturia e te Kawanatanga tetahi apiha hei mahi a hei whakatautau haere i nga tono penihana e tukua atu ana e nga Maori kaumatua o te iwi o Ngaitahu e noho nei i Te Waipounamu me Rakiura? He maha nga pukapuka kua tukua mai ki au mo tenei putake e nga Maori o Murihiku. Otira, tera pea kei te mau tonu i nga whakaaro o te Pirimia, i tae atu ki tona aroaro tetahi ropu Maori i tona taenga ki Riverton i era marama kua taha ake nei, he whakaatu ta taua ropu ki a ia, kaore kau he kai-whakamaori whai raihana o reira hei whakamana a hei haina i nga pukapuka tono penihana. Koia tenei te take i hoatu ai e au tenei patai ki runga ki te Ota Pepa.

Te Hetana (Right Hon. Mr. Seddon, Minita mo te Taha Maori) —Ki te tirohia e te mema honore te pukapuka ritaana kua whakatakotoria nei ki runga ki te teepu o te Whare, tera ia e kite e nuku atu ana i te rima rau nga Maori e whiwhi ana i te penihana.

He Mema Honore.—Kaore kau o Te Waipounamu.

Te Hetana (Right Hon. Mr. Seddon).—Kaore e taea e ahau te puta ki waho o te Ture whakatu ai i etahi apiha motuhake hei mahi i ta te mema honore e tono nei. Ki te tupono nga kai tono penihana ki nga kai-whakamaori a te Kawanatanga, he pai noa atu ma aua apiha e whakamaori atu nga pukapuka kia rite ai ki ta te ture, kia taea ai e nga Maori te whakahaere a ratou tono e whiwhi ai ratou i te penihana pera me etahi atu tangata.

Tame Parata.—Ki taku mahara kua whakaae a Te Pihopa, Kai-whakawa, mana e whakahaere nga tono penihana a nga Maori.

Te Hetana (Right Hon. Mr. Seddon).—Kei te Tari te ritenga, e kore e whakaturia e au etahi apiha motuhake mo tenei mahi.

Te Herihi (Mr. Herries).—Ki etahi takiwa tonoa ai nga Maori kia utu i te whakamaoritanga o a ratou pukapuka tono penihana.

Te Hetana (Right Hon. Mr. Seddon).—E kore ano ra hoki nga kaiwhakamaori e mahi noa iho, i runga i te kore utu, i nga pukapuka tono penihana a nga Maori, haunga ia nga apiha kaiwhakamaori a te Kawanatanga, e kore page 37era e tono kia utua ratou mo ta ratou mahinga i nga penihana a nga Maori.

Haere tonu nga patai a etahi atu mema a mutu noa.