Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paremete: 1896-1899

Paraire, te 24 o Hune, 1898

page 13

Paraire, te 24 o Hune, 1898.

No te hawhe-paahi i te rua karaka ka huikui te Whare.

Ka karakia te Whare.

Te Whakatuwheratanga o Te Paremete.

Ka tae mai te kupu a te Kawana he whakahau kia haere atu nga mema ki te Whare o te Kaunihera.

Haere ana te Tumuaki me nga mema ki te Whare o te Kaunihera, me te haere ano o te Haihana o te Whare i mua i a ratou, a kaore i roa at u kua hoki mai ano ratou ki to ratou Whare.

Te Whai-Korero a Te Kawana.

Te Tumuaki (Mr. Speaker).—Ka ki atu ki nga mema honore, ara, i haere tatou nga mema o tenei Whare ki te Whare o te Kaunihera, i runga i te whakahau a te Kawana, a i pai te Kawana ki te whai-korero ki nga Whare e rua o te Runanga Nui, a kia tino marama ai ta tatou hurihuri i nga korero a te Kawana mauria mai ana e au he tauira o ana kupu i whakapuaki ai, a i runga i nga tikanga o te Whare nei tenei ka whakatakotoria e au taua tauira ki runga ki te teepu o te Whare.

Te Karaka o Te Whare.

Te Tumuaki (Mr. Speaker).—Ka nui toku pouri ki te ki atu ki a koutou, kei te mate te Karaka o to tatou Whare, ara, a Mr. Friend, a e kore e kaha taua tangata ki te mahi i ana mahi i runga i te nui rawa o tona mate. I mua tata o te karangatanga kia huihui tenei tuunga o te Paremete ka tae mai te whakaatu a te takuta o te Karaka o te Whare, he ki mai e kore taua tangata e kaha ki te whakahaere i ana mahi i roto te Whare nei, me te tono mai hoki kia hoatu kia ono kia waru ranei nga wiki kei okiokinga mo taua tangata, me te tumanoko mai o taua takuta ki te hoatu aua wiki e waru tera e hoki mai te tino ora ki te Karaka o te Whare. Na kaore au i hopohopo mo taua tono, he mohio noku kaore koutou e kore te whakaae ina hoatu e au aua wiki e waru, na reira whakaaetia ana e au. Ka toru tekau ma rima nga tau e mahi ana a Mr. Friend i nga mahi o tenei Whare. I roto i taua wa roa e kite tonu ana ahau i te kaha o taua tangata ki te whakahaere i ana mahi. Tera e whakaritea he tangata hei whakakapi i te tuunga o Mr. Frieud i te wa e mate ana ia.

Ka mutu ta te Tumuaki ka tu ake ko te Pirimia me te kai-arahi i te Apitihana, ka mutu a era korero mo te Karaka o te Whare, heoi whakaaetia ana kia waru wiki te wa e hoatu ki a Mr. Friend hei okiokinga mona i tona mate.

Te Mokopuna A Te Kuini.

No tenei ra ka tae mai te kupu a te Kawana, he whakaatu mai i te taenga mai o te pukapuka a te Hekeretari Nui page 14o Ingarangi mo nga Koroni i tuhituhi mai ai hei utu mai mo te karanga a nga Whare e rua o te Paremete kia haere mai te Duke me te Duchess of York ki Niu Tireni nei, a hei whakaatu mai hoki i te nui o te pouri o te Kuini mo tona kore kaore e kaha ki te whakaae kia haere mai tana mokopuna me tona hoa wahine ki Niu Tireni i te maha o nga take nunui nana i pupuri atu raua.

Motini i Whakaaetia.

I runga i te motini a Te Maahi (Mr. Massey) whakaaetia ana kia ngaro atu a Hone Heke mo te marama kotahi i tona nohoanga i roto i te Whare i runga i ona raruraru.

I runga i te motini a Tame Parata whakaaetia ana kia ngaro atu Henare Kaihau mo nga ra kotahi tekau i tona nohoanga i roto i te Whare i runga i ona raruraru.

I runga i te motini a Tame Parata whakaaetia ana kia ngaro atu a Wi Pere mo te wiki kotahi i tona nohoanga i te Whare i runga i ona raruraru.

No te hawhe paahi i te tekau ma rua karaka i te po ka hiki te Whare.