Taite, te 20 o Oketopa, 1898.
Pire Penihana Kaumatua.

H. K. Taiaroa.—E te tumuaki, e hiahia ana au ki whaikupu ruarua nei mo tenei Pire, i mua o te pooti. I to tatou korerotanga mo tenei Pire i tera tau, i ki atu au e aroha ana ano au ki nga koroheke me nga rawakore, engari i mahara ano au he mea tika kia taihoa marire ano au pooti ai mo taua tikanga. No muri mai nei kua haere au ki te korero haere ki aku hoa Maori o tera motu, a kua patai haere au mo aua tikanga, a i whakaatu mai ratou i aku korero i roto i te pukapuka o nga whai-page 11korero o te Paremete, me ta ratou ki mai naku i turaki atu taua Pire Penihana hei whakarite penihana atu mo ratou. I ki mai ratou he tangata nui au, a kua maha oku tau e tu ana hei mema mo te Paremete, a he aha te take i kore ai au e aroha atu ki te hunga rawakore me nga koroheke. E hara i te mea ko nga Maori anake i whaikupu mai ki au, engari he maha ano aku hoa Pakeha o Otakou me Katipere, mohio mai ki au o taku tamarikitanga mai ra ano, a inoi mai ana kia arohatia atu ratou e noho pohara mai nei, me te tono mai kia tautoko au i te Pire. E pouri ana au mo taua kupu a ratou kaore au i te aroha atu ki a ratou, no reira au i mea ai me whakamarama atu e au ka pooti au i naianei ki te tautoko i taua Pire, a e mahara ana hoki au he mea tika kia whaikupu whakamarama atu au ki aku hoa Mema i pooti tahi ra matou i tera tau. He nea maku kia marama mai ratou ki te take i ahua whakarere ai au i a ratou i tenei pootitanga. E aroha atu ana au ki aua mema, tera hoki pea ratou e mahara e whakarerea ana ratou e au. E mea atu ana au ki a ratou kia kaua e mauahara mai ki au.