No te hawhe-paahi i te rua karaka ka noho te Tumuaki ki runga ki tona nohoanga.

Ka karakia te Whare.

Ka mutu te korero o etahi Pire me etahi atu mea ka tae ki te patai mo.

Horowhenua Moana.

Ko Tiaki Tiwini (Mr. Stevens).—Ka patai ahau ki te Minita mo nga Whenua, Mehemea, ina taturu te tau o nga tiwhikete o taua wahi, tera ranei e e hokona e ia te moana katoa o Horowhenua i nga Maori no raton a reira, me etahi whenua hoki i nga taha tawhio noa taua moana, hei paaka mo te iwi katoa, me te rahui ano mo nga Maori tuku iho ki o ratou iwi, i a ratou pa tuna me a ratou wahi mahinga ika; a ko taua moana me taua whenua ina oti te hoko me whakatapu rawa hei paaka, a me tuku atu ki te Kaute Kaunihera ki te Poari ranei o taua takiwa pupuri ai? Ka whakaatu ahau ki te Whare, he pai taua moana hei wahi tuunga mo nga mahi ahuareka a nga iwi o era takiwa, a hei tuunga hoki mo nga purei hoehoe poti a te iwi o te takiwa o Poneke. Ki te hokona taua wahi e te Minita mo nga Whenua, tena e koa rawa nga tangata o Poneke. Te take i uia ai e au tenei patai he hiahia noku kia whakahaerea taua mea, kei waiho roa ka raruraru noa iho. He nui nga raruraru i pa ki tenei whenua, a he nui nga moni a te koroni kua pau i te whakahaerenga i aua raruraru. Kaore ano a Horowhenua Moana i wawahia ki nga hapu nona. Ko te nui o taua roto e tata ana ki te 600 eka. Kei nga Maori taua wahi i naianei, a taro ake nei ka whakataua nga paanga ki taua roto. Hei painga nui rawa mo nga iwi o te Takiwa Porowinitanga o Poneke mehemea ka tahuri te Kawanatanga ki te hoko i taua roto, a ka riro atu i a ratou me whakatapu, ka tuku atu ai ki te Kaute Kaunihera ki te Poari ranei o taua takiwa tiaki ai whakahaere ai, a na reira ka tika kia pai te utu mai a te Minita i tenei patai.

Te Makenehi (Hon. J. McKenzie).—Kua whiriwhiria e te Kawanatanga tenei patai. Kua ripoatatia e te Kawanatanga he mea tika kia hokona te roto o Horowhenua, me tetahi atu roto e tata ana ki reira; otira, ki te pai te Paremete ki te whakarite i etahi moni hei hoko i aua wahi, kaore pea he take e uaua ai te whakahaere o ta te mema honore i tohutohu mai nei. Heoi maku e ata hurihuri tenei mea, a, taihoa ake nei, tena pea ahau e ahei te ki atu, ka tonoa ranei e te Kawanatanga ki te Whare kia whakaritea he moni hei hoko i taua wahi kaore ranei.

No te mutunga o tenei patai ka haere tonu te mahi a te Whare ki etahi atu patai me etahi Pire.

No te toru tekau ma rima meneti te paahitanga o te tahi karaka i te po ka hiki te Whare.