No te hawhe-paahi i te rua karaka ka huihui te Whare.

Ka karakia te Whare.

Panuitanga Tuatahi.

Ka panuitia tuatahitia tetahi Pire.

Te whakatuwheratanga o te paremete.

Ka tae mai te kupu a te Kawana, he whakahau kia haere atu nga menia ki te Whare o Runga.

Haere ana te Tumuaki me nga mema ki te Whare o Runga, me te haere ano o te Haihana o te Whare i mua i a ratou, a kaore i roa atu kua hoki mai ano ki to ratou Whare.

Pukapuka Mihi Atu Ki A Te Kuini.

Ko Te Tumuaki (Mr. Speaker).—Kua tae mai ki au te reta a te Honore Pirimia mo te pukapuka i tukua atu nei e nga mema o tenei Whare ki a te Kuini, he mihi ki a ia mo te ekenga o ona tau ki te ono tekau e noho ana i runga i te torona o Ingarangi. Koia tenei taua reta a te Pirimia:—

"Tari o te Pirimia,

"Poneke, 21 o Hepetema, 1897.

"E Pa,—E whai honore ana ahau ki te whakaatu ki a koe, ara, i runga i te kupu whakahau i tae au ki Windsor a na toku ringa tonu i hoatu ki a te Kuini te pukapuka o nga kupu mihi atu a tenei Whare ki a ia, a koia tenei e whai ake nei te whakahoki mai a te Kuini:—

"'E whakawhetai atu ana ahau ki te Runanga Kaunihera me te Whare o Raro o te Paremete o Niu Tireni mo a ratou kupu e whakaatu mai nei i te tika o a ratou mahi me to ratou piri pono ki au. Ka nui toku aroha mo te maha rawa o nga kupu kua tae mai ki au he whakaatu mai i te piri pono o oku iwi katoa ki te hapai i toku torona i tenei wa i tutuki nei ki te ono tekau oku tau e tu ana hei Kuini, a ka nui toku koa mo te kaha o ton Paremete ki te tautoko i enei whakaaro.

"'Ka whakahau atu ahau i a koe kia haria atu e koe taku whakawhetai pono ki te Runanga Kaunihera me te Whare o Raro o te Paremete o Niu Tireni.'

"Te Hetana (R. J. Seddon).

"Ki te Hon. te Tumuaki o te Runanga Kaunihera."

Ko Te Makenehi (Hon. J. McKenzie).—Ka motini ahau, kia tuhituhia nga kupu whakahoki mai a te Kuini ki roto ki nga Pukapuka o te Whare.

Whakaaetia ana te motini.

Ko Te Tumuaki (Mr. Speaker).—Kua tae mai ki au te kupu a te Kawana, koia tenei e whai ake nei:—

"Tenei ka tukua atu e te Kawana ki nga mema o te Whare Paremete te tauira o te pukapuka a te Right Honore Hekeretari Nui mo nga Koroni o Ingarangi he whakaatu i te taenga o te pukapuka mihi a te Paremete o Niu Tireni ki a te Kuini mo te tutukitanga o ona tau ki te ono tekau e tu ana hei Kuini mo Ingarangi me ona koroni.

"Whare o te Kawana,

"Poneke, 21 o Hepetema, 1897."

page 29

Koia tenei taua pukapuka.

"Downing Street,

15 o Hurae, 1897.

"E te Kawana,—E whai honore ana ahau ki te whakaatu ki a koe kua tae mai te pukapuka Nama 29 a Sir James Prendergast, i tuhia nei e ia i te 13 o Mei, he tuku mai i te pukapuka o nga kupu mihi mai a nga Whare e rua o te Paremete o Niu Tireni, a ki te ki atu ki a koe na te tinana tonu o Te Hetana (Right Hon. R. J. Seddon) i kawe taua mea ki a te Kuini a nana i hoatu ki a ia, a pai ana te Kuini ki te hamumu atu i etahi kupu atawhai ki a ia.

"J. Chamberlain,

"Hekeretari Nui mo nga Koroni.

"Ki a Te Kawana, the Right Honourable the Earl of Ranfurly, K.C.M.G., &c."

Ko Te Hetana (Right Hon. Mr. Seddon).—Ka motini ahau kia tuhituhia tena pukapuka ki roto ki nga Pukapuka o te Whare.

Whakaaetia ana te motini.

Te Whai-Korero A Te Kawana.

Ka tu ake te Tumuaki ka ki atu ki nga mema honore, ara, i runga i te whakarongo ki te whakahau a te Kawana, haere ana tatou kia kite i te Kawana i te Whare o Runga, a pai ana te Kawana ki te whai-korero ki nga Whare e rua o te Runanga Nui, a kia tino marama ai ta tatou titiro i nga korero a te Kawana kua haria mai e au he tauira o ana kupu i whakapuaki ai, a ka whakatakotoria e au taua tauira ki runga ki te teepu o te Whare.

Hon. Meiha Ropata Wahawaha, N.Z.C.

Ko Te Tumuaki (Mr. Speaker).—Ka whakaatu ki te Whare ka rua nga mema o te Paremete me te Runanga Kaunihera kua mate, ara, ko Te Piha (Mr. Fisher) to te Paremete, a ko Meiha Ropata Wahawaha to te Kaunihera.

Ko Te Hetana (Right Hon. Mr. Seddon).—I tu ake ki te whakaputa i ana kupu aroha mo Ropata Wahawaha me Te Piha i te mea kua wehe atu nei raua i te Paremete. He roa ana korero. Ka mutu ka motini kia nukuhia te Whare ki te ra apopo, hei whakaatu i te nui o te pouri o te Whare mo te matenga o enei mema tokorua.

Ko Kapene Raheea (Hon. Captain Russell).—Ka tu ake ki te tautoko i te motini a te Pirimia, me te whakatepe haere i nga korero mo enei mema tokorua kua heke atu nei i a ratou.

Whakaaetia ana te motini.

No te rua tekau meneti ki te rima karaka i te ahiahi i hiki ai te Whare.