Pire Whenua Maori.

Ko Wi Pere.—E te Pika, e tono ana ahau kia korerotia taku Pire, notemea ko tetahi tenei o nga Pire nui mo te taha Maori hei whakarite i nga hiahia me nga tono a te iwi Maori ki tenei Whare. He kupu atu tenei naku kia pai ta koutou whakarongo me ta koutou whiriwhiri i te Pire e mau nei ki toku ingoa. Notemea he nui rawa te taima i pau noa iho i nga Pire anake mo te taha Pakeha, he tau, hoki atu ko aua Pire, he tau, hoki atu ko aua Pire. Na ko taku he Pire tino hou tenei, a he Pire nui rawa atu, hei whakarite i nga hiahia o te iwi Maori. Ko tenei ka tono atu ahau ki te Whare kia panuitia page 102tuaruatia taku Pire. Kaore ahau e pai kia patua taku Pire e koutou, ma te Kawana ra ano taku Pire e patu ka mutu ai taku tohe.

No te takanga ki konei o nga korero a te mema honore ka tu ake etahi o nga mema ki te whakararuraru kia hinga te Pire a Wi Pere.

Katahi ka tu atu etahi o nga mema e tautoko ana i te Pire, ka karanga me tuku ki te pooti.

Heoi pooticia ana, a hinga ana nga kai-turaki.

Koia tenei te pooti, ara, e toru tekau ma rua i te taha e awhina ana i te Pire, a tekau matahi tonu i te taha turaki. Kei raro nei nga ingoa o nga mema i pooti, ara:—

I te Ae, 32.

• Cadman
• Carncross
• Carnell
• Carroll
• Collins
• Guinness
• Hall
• Hall-Jones
• Harris
• Hogg
• Houston
• Kelly, W.
• Larnach
• McGowan
• McKenzie, J.
• McKenzie, R.
• McLachlan
• Meredith
• Millar
• Mills
• Montgomery
• Morrison
• Parata
• Pinkerton
• Stevens
• Steward
• Thompson, R.
• Thompson, T.
• Ward
• Willis.
• Kai-tatau.
• Pere
• Pirani.

I te Noo, 10.

• Bell
• Buchanan
• Kelly, J. W.
• Lewis
• McNab
• O'Regan
• Russell, W. R.
• Wilson.
• Kai-tatau.
• Allen
• Tanner.

Te putanga o te hunga tautoko, 22.

Paahi ana te panuitanga tuarua o te Pire.

Na i te mea kua tata tonu te mutu o te Paremete nukuhia ana mo tera tau tenei Pire.

Ka mutu te Pire a Wi Pere ka haere tonu te mahi a te Whare a mahue noa te weherua i te po. Ka tata ki te toru karaka i te ata-tu, ka tu atu te Pirimia o te Koroni o Niu Tireni, ara, a Te Hetana, ka panui ki te Whare i te pukapuka rarangi o nga mahi katoa i whakahaerea e te Whare i tenei huinga o te Paremete, me te ata whakaatu atu ano i nga ture i oti, ara, i paahi, a i nga mea hoki kihai i tau i te Whare. Koia tenei e whai ake nei.