Wenerei, te 7 o Oketopa, 1896.

No te hawhe-paahi i te rua karaka ka noho te Tumuaki ki runga ki tona nohoanga.

Ka mutu te karakia.

Ka whakahaerea ko nga patai me etahi atu mea, ka taka ki te patai a Hone Heke mo—

Te Tiriti O Waitangi. Ko Te Hatihana (Mr. G. Hutchison).—I te mea kei te raruraru a Heke ki etahi atu mahi, maku e ui tana patai, ara, ka patai atu ahau ki te Pirimia, Mehemea tera e whakangawaritia ara e whakawatearia e te Kawanatanga nga huarahi e ahei ai nga iwi Maori te whakatakoto i o ratou tika i raro i te Tiriti o Waitangi kia whakataua i runga i te tuku ki te Paremete o Ingarangi, ki te Piriwi Kaunihera ranei a te Kuini; a kia tutuki ai taua tikanga, ka whakaae ranei te Kawanatanga kia whakaturia he keehi whakamatau i raro i nga rarangi o taua Tiriti, engari me timata te whakahaere o aua keehi i roto i te rima tau, timata i te tahi o nga ra o Hanuere e haere mai nei, ma tetahi Maori, ma etahi Maori ranei, mo te taha ki te iwi nui tonu o te Maori, i runga i nga take e mahara ai ratou, e taupapatu ana, e takahi ana hoki, i nga ritenga o taua Tiriti? Tenei ka ui atu ahau kia tirohia e te Pirimia, ki ana kupu i whakapuaki ai i te 29 o Hepetema nei; i tana whakapuakitanga i ona whakaaro mo te tika o te Karauna ki nga koura me nga hiriwa i runga i nga whenua Maori, i ki nei ia, mehemea ki te whakamatauria he keehi ki roto i nga Kooti o te Ture, ka kitea kei te tika tana kupu. Na, kei te hiahia nga Maori kia whakamatauria he keehi i runga i te aronga o tana kupu.

Ko Te Hetana (Hon. Mr. Seddon).—Kei nga Maori ano te whakaaro ki te haere i runga i ta ratou huarahi i pai ai.

Ka mutu tenei patai ka haere tonu te mahi a te Whare i etahi atu mea.

No te rua tekau meneti ki te rua karaka i te po ka hiki te Whare.