Ture Mo Nga Whenua Maori.

Ko Hone Heke.—Ka patai ahau ki te Minita Maori, Mehemea tera ranei e whakaurua mai e te Kawanatanga ki tenei Whare i tenei tuunga o te Paremete, tetahi Pire hei whakatikatika i "Te Ture Whakatikatika i nga Ture Whenua Maori, 1895"? He maha nga Maori e noho mate ana i naianei i raro i nga ture i paahitia i nga tau 1894-95. I roto i etahi takiwa o te koroni nei kei te reititia nga Maori mo o ratou whenua, a kei te araia e aua ture nga huarahi e taea ai e ratou te riihi o ratou whenua, a e taea ai e ratou te utu haere i aua reiti me aua taake.

Ko Timi Kara (Hon. Mr. Carroll).—Heoi ano nga Pire mo nga Mea Maori e kokiritia e te Kawanatanga ki roto ki te Whare i tenei tuunga o te Paremete ko ngo Pire e mau nei i te Ota Pepa. Otira tera pea a ko ake nei e whakaurua etahi Pire hei whakatikatika i etahi wahi o nga ture, a hei whakaora i etahi mate e pa ana ki te iwi Maori. Engari ki te tau te whakaaro o te Kawanatanga me pera, maku e ata whakaatu atu ki te mema honore te aronga o aua menemana.

Ka mutu tenei patai a te mema honore mo te Takiwa Maori Whaka-te-Tai-Tokerau o Aotearoa, ka maro tonu te haere o nga mahi a te Whare.

No te rima meneti ki te tahi karaka i te po ka hiki te Whare.