Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paremete: 1896-1899

Taite, te 17 o Hepetema, 1896

Taite, te 17 o Hepetema, 1896.

No te hawhe-paahi i te rua karaka ka noho te Tumuaki ki runga ki tona nohoanga.

Ka mutu te karakia.

Ka whakahaerea ko etahi mahi, a no te po ka takoto ko te—

Pire Tuku Nama Moni Kawanatanga Ki Nga Ropu Takiwa.

No tenei po ka uru tenei Pire ki roto ki te Komiti nui o te Whare.

He nui nga mema i kokiri menemana mo tenei Pire, ara, ko te Pirimia, Mr. Allen, Mr. Pirani, Mr. Hogg, Mr. Wilson, Captain Russell, Mr. Buchanan, Mr. Duncan, Mr. Morrison, Mr. Maslin, me Dr. Newman. Ka mutu te whakahaere o a enei—

Ko Hone Heke.—Ka tu atu ahau ki te motini kia whakaurua te menemana e whai ake nei ki roto ki te Pire nei, ara:—

"I muri iho i te paahitanga o tenei Ture, kaua he mea i roto i 'Te Ture Tuku Nama Moni Kawanatanga ki nga

Ropu Takiwa, 1886,' etahi atu ture ranei e whakatikatika ana i taua Ture, e whakamana i te ropu takiwa, i tetahi tangata ranei i whakaturia e ratou, ki te uta i te reiti motuhake ki runga ki te whenua o te Maori: Engari kaua tenei tekiona e kaha ki te arai i te whenua e meatia ana kia reititia motuhaketia mehemea kua tukuna atu e te ture ki te Maori ki nga Maori ranei nona te whenua nga tikanga me nga painga mo o ratou whenua kua whakawhiwhia nei ki nga pononga Pakeha a te Kuini e noho nei i roto i tenei koroni."

Me whakamarama atu ahau ki te Whare, ko te aronga o tenei rarangi hou aku he whakakore i te mana o nga ropu takiwa, ara, o nga Kaute Kaunihera me nga Bori Pooti, ki te whakatau reiti motuhake ki runga ki nga whenua Maori, i raro i te mana kua tukua ki ana, ropu takiwa e "Te Ture Tuku Nama Moni Kawanatanga ki nga Ropu Takiwa, 1886."

No te hoatutanga kia pootitia te tekiona hou a Hone Heke kaore te Whare i pai, heoi hinga ana.

Katahi ka haere tonu te mahi a te Whare i etahi atu mea.

No te rima meneti ki te tahi karaka i te po ka hiki te Whare.