Henare Tomoana.

Ko Te Hutana (Mr. Houston).—Ka mauria atu e au te ripoata a te Komiti mo nga Mea Maori, a ka motini ahau kia whakatakotoria ki runga ki te teepu o te Whare.

Ko Wi Pere.—Ka motini ahau kia whakahokia ano tenei pitihana ki te Komiti mo nga Mea Maori kia whiriwhiria ano e taua hunga. I te ra i mahia ai taua pitihana e te Komiti he torutoru noa iho nga mema i tae ki te Whare Komiti, na reira i mea ai ahau me whakahoki tenei pitihana ki te Komiti kia tino whiriwhiria ano e nga mema katoa o te Komiti.

Ko Te Hutana (Mr. Houston).—Ki taku kaua te Whare e whakaae kia whakahokia tenei pitihana ki te Komiti. I tino whiriwhiria taua mea, a ki te pai te Whare maku e panui atu te ripoata a te Komiti mo taua pitihana, i te mea ma tera pea e mohio ai nga mema honore o te Whare e he ana te tono a te mema honore mo te Takiwa Maori o te Tai-Ra-whiti. Koia tenei te ripoata:—

"E ki ana te kai-pitihana kei te whakaurua hetia etahi tangata hei kai-riiwhi mo etahi hea i roto i te whenua Rahui i Te Karamu, Haaki Pei; a e inoi ana kia whakahaerea etahi tikanga hei arai i taua mahi.

"Kua whakahaua ahau kia ki penei, kua kitea e te Komiti kua whakataua tenei putake e te Kooti Whakawa Tuarua, a i te mea kaore e ahei tenei Komiti ki te uiui i nga mahi a taua kooti, heoi kaore kau ana kupu mo runga i tenei pitihana."

Ki taku whakaaro kei te he te tikanga e tuku mai nei i enei tu pitihana ki te Whare. Kaore nga Komiti i whakaturia hei mahi i enei tu pitihana. Ko te Kooti Whakawa Tuarua te kooti i ata whakaturia hei whakaoti i enei tu keehi, a ki te whakahokia enei tu pitihana ki te Komiti kaore rawa he mutunga. Ki taku whakaaro ka pohehe te Whare ki te whakaaetia kia whakahokia te pitihana ki te Komiti.

Ko Ta Ropata Taute (Sir R. Stout).—Ki tana he tika noatu te whakahoki i te pitihana ki te Komiti, notemea ko te mate kua pa nei kia Henare Tomoana he tino mate, a ko taua mate e kore e taea e te Kooti Whakawa Tuarua te mahi; na reira te mea tika me whakahoki taua pitihana ki te Komiti kia whiriwhiria ano.

Ko Te Hetana (Hon. Mr. Seddon).—Ka tu ake ahau ki te whakanuku i tenei korero.

Whakaae ana te Whare, a nukuhia ana te korero mo te pitihana a Henare Tomoana ki tetahi atu ra.