No te hawhe-paahi i te rua ka noho te Tumuaki ki runga ki tona nohoanga.

Ka mutu te karakia.

Ko Te Tumuaki, ka whai korero ahau ki te Whare moku e ngaro atu nei i toku nohoanga i runga i taku paanga e te mate, me taku whakawhetai atu hoki ki te Tiamana o nga Komiti mo tana whakahaerenga i aku mahi i au e ngaro atu nei.

Ka panuitia tuatahitia etahi Pire a ka mahia etahi atu mea ka tae ki te—

Pire Taone Maori.

Ko Te Makenehi (Hon. Mr. J. McKenzie), ko te Minita tenei mo nga Whenua, ka tu atu ia ki te motini kia panuitia tuaruatia e te Whare te Pire Taone Maori. Ka whakamarama haere ia i nga tikanga o taua Pire, ara, he tono kia hoatu he mana ki te Kawanatanga ki te rahui i etahi whenua Maori, i nga wahi o te motu nei e mohiotia ana he wahi pai hei tuunga taone, ahakoa kei hea e takoto ana; me tana whakahua haere ano i etahi o nga wahi e maharatia ana he wahi pai hei tuunga taone pera, ara, ko Pipiriki, ko Moawhango me etahi atu wahi. Me tana ki atu ano ki te Whare he tino tikanga nui kei roto i taua Pire, a tera e puta he tino painga ki nga Maori no ratou nga whenua e rahuitia ana hei taone. Ko te hiahia o te Kawanatanga, ina oti te panui tuarua o te Pire e te Whare, me tuku atu taua mea ki te Komiti mo nga Mea Maori kia ahei ai nga Maori e hiahia ana ki te korero mo taua Pire te haere atu ki reira whakapuaki ai i o ratou whakaaro mo runga i taua mea. Tenei ano te roanga ake o nga korero a taua Minita. Ka mutu ia.

Ka tu ake ko Te PERE (Mr. Bell), ko Takuta NUMANA (Dr. Newman) me etahi atu mema tokowha. Ka mutu enei, heoi paahitia ana e te Whare te panuitanga tuarua, a tukuna atu ana te Pire ki te Komiti mo nga Mea Maori.