Pire Whakanohonoho Whenua Ki Te Tangata

Na Te Makenehi (Hon. Mr. J. McKenzie), te Minita mo nga Whenua, i timata te korero mo te panuitanga tuatoru o tenei pire. Ka mutu ia ka tu ake ko Kapene Rahera (Hon. Captain Russell), ko Te Hatihana (Mr, G. Hutchison), Te Tuhi (Mr. Duthie), me etahi atu mema Pakeha kia noho iho era ka tu atu—

Ko Hone Heke—E hiahia ana ahau ki te utu atu i etahi o nga korero a nga mema honore, i whakaputa ai i tenei korerotanga, mo te peeke o Niu Tireni, a mo te aronga hoki i nga tikanga e whakahaerea nei i te kawanatanga mo runga i nga whenua a taua kamupane. I mua ake nei, i au e korero ana mo tenei mea, i ahua penei aku korero, ara, mehemea pea na te Apitihana i homai ki te Whare nei tetahi tikanga e taea ai te tautoko o taua peeke, tena pea kua whakapaea te Apitihana e te Kawanatanga me nga mema e tautoko nei i te Kawanatanga, a kua ki ratou i mahia taua tikanga hei whakaora i nga mate o nga tangata tautoko i te taha Apitihana. Otira, ki taku mahara, i pera tonu te ritenga o nga koreto a te Minita mo nga Whenua. E kiia ana ko te take i tata ai te palaru ai i runga i te nama ki nga tangata tautoko i te Apitihana. He tika ranei taua korero he tito ranei. Heoi te mea e mohiotia ana e tatou, kua whakaaetia e tenei Whare etahi moni nui atu ma taua peeke, a kaore tatou i te mohio mo ahea ra e ea ai i taua peeke aua moni a te koroni. A ko tenei mahi i taea ai na tenei Kawanatanga, ara, na te Kawanatanga e ki nei page 55ko ratou nga hunga hapai i nga mea e hiahiatia ana e nga kai-mahi me nga rawakore o te koroni nei. E rima miriona te moni a te koroni kua whakaaetia e ratou ma taua peeke, a kaore rawa te Whare nei i te mohio ka ora ranei taua peeke i aua rima miriona pauna moni, kaore ranei.

Ko Te Tepute-Pika.—Ki taku mahara kei te marara ke noa atu nga korero a te mema honore, kaore i te hangai ki te putake kua whakatakotoria nei hei korero ma te Whare, ara, me panui tuatoru ranei te Pire Whakanohonoho Tangata ki ruuga ki te Whenua kauaka ranei.

Heoi noho ana a Hone Heke ki raro.

He maha nga mema Pakeha i korero i muri i a Hone Heke. Na te Minita mo nga Whenua te whai-korero whakamutunga.

Katahi ka tukuna te motini kia panuitia tuatorutia te Pire, a paahitia ana.

No te tekau ma rima meneti te paahitanga i te tahi karaka i te po ka hiki te Whare.