Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paramete: 1891-1895

Turei, te 23 o Hurae, 1895

Turei, te 23 o Hurae, 1895.

No te hawhe-paahi i te rua karaka ka noho te Tumuaki ki runga ki tona nohoanga.

Ka mutu te karakia.

Ka whakahaerea ko nga patai me etahi atu Pire, ka mutu era ko te—

Pire Taiapa.

Na Te Makenehi (Hon. Mr. J. McKenzie) i motini kia panuitia tuaruatia tenei Pire. Ka whakamarama haere ia i nga tikanga a mutu noa. I muri i a ia ka tu ake etahi mema honore torutoru nei ka, korero mo te Pire. Ka mutu era ka tu ake—

Ko Hone Heke.—Ki tana mahara he pai rawa kia kaua tenei Pire e pa ki nga Maori, engari me whakauru etahi rarangi ki roto ki te Pire Kooti Whenua Maori hei whakahaere i nga mahi taiapa mo nga whenua Maori, ara, me hoatu he mana ki nga komiti Maori, a ma aua komiti me nga Pakeha no ratou nga whenua e piri ana ki nga whenua Maori e whakahaere he tikanga mo nga taiapa

Ko Tame Parata. Ko tekiona toru o tenei Pire kei te pa ki nga Maori, a ko taku hiahia, i mua o te komititanga o tenei Pire, me whakamaori katoa nga wahi o te Pire e pa ana ki nga Maori. Tena ko nga whenua Maori o te Waipounamu, kaore kau he raruraru mo era, notemea kei te whakaae tonu nga Maori o reira ki te mahi i nga taiapa roherohe i o ratou whenua. Ka tautoko ahau i te panuitanga tuarua o tenei Pire.

He toruturu nei nga mema i korero i muri i a Tame Parata a paahitia ana te panuitanga tuarua o te Pire.

Pire Reiti Whenua Kaore Ano I Whakapaingia.

Na Te Waari (Hon. Mr. Ward), Minita mo nga Moni o te Koroni i motini kia panuitia tuaruatia tenei Pire. He poto ana korero.

Ko Hone Heke.-He whakahe tana i te Pire, notemea kei te araia, e te Ture Kooti Whenua Maori o tera tau. te riihi a te Maori i tana whenua ki te Pakeha, ki tetahi atu tangata ranei, a i te mea he iwi kuare te Maori ki te mahi paamu, me era atu tu mahi, e puta mai ai he ora i te whenua, na reira ka mahara ia kaore i te tika kia eke te mana o te Pire ki runga ki nga whenua Maori. Tenei ano te roanga atu o ana korero.

He maha nga mema i korero mo tenei Pire, heoi paahitia ana tona panuitanga tuarua.