No te hawhe-paahi i te rua karaka ka noho te Tumuaki ki runga ki tona nohoanga.

Ka mutu te karakia.

Ka panuitia tuatahitia tetahi Pire ka mutu tera ka whakahaerea ko nga patai, ka pau etahi patai maha ka tae ki te patai mo:—

Horowhenua Poraka.

Ko Te Wirihana (Mr. Wilson).— Ka patai ahau ki te Minita mo nga Whenua, mo awhea tuwhera ai ki te makete ki te iwi katoa te wahi o Horowhenua Poraka i hokona nei e te Kawanatanga i nga Maori, ara, te wahi o taua whenua e tata ana ki te Paamu Kawanatanga i Rewiini? Te take o tenei patai aku, ma tenei pea e tahuri ai te Minita ki te akiaki i nga apiha o tona tari kia whakahohorotia taua mahi. He tika rawa hoki kia tere te whakanohonoho o taua whenua ki te tangata inaianei tonu, notemea ki te whakaroaina ka mahue te taima tika hei tuanga i te ngaherehere, a ka moumou noaiho tenei tau. Koia tenei te take i tono ai ahau kia tino whakaaturia mai mehemea ka tere tonu te tuku i taua wahi whenua kia maketetia.

Ko TeMakenehi (Hon. J. McKenzie, Minita mo nga Whenua).—Ki toku whakaaro, ana patai mai tetahi mema honore, he mea pai kaua e whakapuaki kupu whakakino mo te Kawanatanga, ara, e mea kei te mangere nga apiha o toku tari, a kaore i te whakahaua e ahau kia mahi i nga mahi. Me whakaatu ahau ki te Whare kaore nga apiha o toku tari i te mangere, otira ana kitea te mangere o nga apiha o te tari, ka mohio noatu ahau ki te whakaaro tikanga mo ratou, kaua e tohutohungia mai. Kanui te ngakaunui o nga apiha o toku tari ki te whakahaere i nga tikanga e tere ai te tuwhera o nga whenua mo te whakanohonoho ki te tangata, he rite tonu ki toku to ratou ngakaunui. Na mo te wahi Whenua e pataia nei, kua tata tonu te puta o nga mapi me nga panui, a e kore pea e maha nga ra ka taea te tuku atu taua whenua kia maketetia.

page 14

Nga Maori O Waitaki Me Waihao.

Ko Te Takena (Mr. Duncan).—Ka patai ahau ki te Pirimia mehemea ranei ka whakaritea e te Kawanatanga he takuta mo nga Maori o Waitaki me Waihao, pera ano me nga Maori o Waikouaiti me Moeraki?

Ko Te Hetana (Hon. R. J. Seddon, te Pirimia mo te Koroni.—Ko taku utu atu mo tenei patai ka pera ano me nga korero kua whakapuakina i mua atu, mo enei tu mea, i roto i tenei Whare, ara, ka ata uiuia, a ki te kitea he mea tika kia whakaritea he takuta mo taua iwi, heoi ka whakaturia e te Kawanatanga he tangata hei takuta mo aua Maori.